میلبورن۔ 19اپریل ( سیاست ڈاٹ کام ) آسٹریلیا کے سابق کپتان مارک ٹیلر نے کہا ہے کہ کورونا وائرس کی وجہ سے کھیل سرگرمیاں ٹھپ ہونے کے سبب اقتصادی چیلنج کا سامنا کر رہے کرکٹ آسٹریلیا (سی اے ) ملازمین کے بعد کھلاڑیوں کی تنخواہ میں بھی کمی کر سکتا ہے ۔کورونا وائرس کی وجہ سے دنیا بھر میں کھیل سرگرمیاں ٹھپ پڑی ہوئی ہیں اور ایسے میں مختلف کرکٹ بورڈ کو اقتصادی چیلنج کا سامنا کرنا پڑ رہا ہے ۔ سی اے کے چیف ایگزیکٹو آفیسر کیون رابرٹس نے اقتصادی پریشانی کا حوالہ دیتے ہوئے عملے کو تنخواہ میں کمی کے ساتھ چھٹی پر بھیج دیا تھا۔سی اے نے جون تک ملازمین کی تنخواہ میں 80 فیصد کمی کرنے کا فیصلہ کیا ہے ۔ 2018 تک سی اے کے ڈائریکٹر رہ چکے ٹیلر نے امید ظاہرکی ہے کہ ملازمین کے بعد بورڈ کھلاڑیوں کی تنخواہ کاٹ سکتا ہے ۔ٹیلر نے کہا کہ سی اے کے ملازمین کی تنخواہ میں کمی کی گئی ہے ۔ اگلا نمبر کھلاڑیوں کا ہو سکتا ہے ۔ سی اے اور آسٹریلیا کرکٹ ایسوسی ایشن (اے سي اے ) اس سلسلے میں غورکر رہے ہیں۔ وہ امید کرتے ہیں کہ دونوں ساتھ میں بیٹھ کر اس معاملے کا حل تلاش کرلیں گے ۔ انہوں نے کہا کہ چھ ماہ کا وقت کافی طویل ہوتا ہے ۔ اس وبا میں یہ کتنا لمبا چلے گا پتہ نہیں لیکن اگر اکتوبر میں کرکٹ شروع ہوتا ہے تو اس سے کھلاڑیوں کو بڑے پیمانے پر تنخواہ کٹوتی سے راحت مل سکتی ہے ۔ کسی کو نہیں معلوم کہ اس سے کرکٹ پر کتنا اثر پڑے گا۔
