آسٹریلیا میں ناکامی کے مصباح الحق ذمہ دار

   

کراچی ۔8 ڈسمبر ( سیاست ڈاٹ کام ) سابق ٹسٹ کرکٹر محسن حسن خان نے کہا ہے کہ دورہ آسٹریلیا میں پاکستان ٹیم کی مایوس کن کارکردگی کے ذمہ دار کوچ مصباح الحق ہیں۔ کراچی پریس کلب میں میٹ دی پریس سے خطاب کرتے ہوئے محسن حسن خان نے کہا کہ بولنگ کوچ وقار یونس کو چار مرتبہ ناکامی کی وجہ سے ہٹایاگیا پھر انہیں بولنگ کوچ بنادیا گیا، وزیر اعظم عمران خان نے کہا تھا ’’رائٹ مین رائٹ جاب‘‘ یہ دعویٰ کہاں گیا؟ پاکستان کرکٹ ٹیم آسٹریلیا کے دورے کے بعد وطن واپس پہنچ چکی ہے۔ ٹیم کے کپتان اظہر علی نے لاہور میں پریس کانفرنس کے دوران ٹیم کی کارکردگی کو غیر معیاری قرار دیتے ہوئے کہا کہ اس کارکردگی کی کوئی معافی نہیں ، ہم نے اس طرح مظاہرہ کیا ہی نہیں جیسا سوچا گیا تھا۔ اظہر علی نے کہا کہ دورہ آسٹریلیا میں بابر اعظم اور رضوان کی بیٹنگ اور نوجوان بولروںکی بولنگ ایک مثبت اشارہ ہے۔ سری لنکا کے دورہ پاکستان کے حوالے سے اظہر علی نے کہا ہے کہ سارے ہی کھلاڑی پہلی مرتبہ یہاں کھیلیں گے، ہمیں سوچ سمجھ کر یہاں اچھا کھیلنا ہوگا۔ یاد رہے کہ پاکستان کو آسٹریلیا کے کیخلاف دو ٹسٹ میچوں کی سیریز میں وائٹ واش کا سامنا کرنا پڑا تھا۔