کینبرا : 20 اگست ( ایجنسیز ) آسٹریلیا نے اسرائیلی وزیر اعظم بنجامن نیتن یاہو کے آسٹریلوی وزیر اعظم انتھونی البانیز کے حوالے سے بیان” اسرائیل سے غداری کرنے والا کمزور سیاستدان ” پر سخت ردعمل کا مظاہرہ کیا ہے۔یہ دونوں ممالک کے درمیان کشیدگی میں تازہ اضافہ ہے۔آسٹریلیا کے وزیر داخلہ ٹونی برک نے کہا کہ نیتن یاہو کا یہ بیان ایک “مایوس رہنما کی جھنجھلاہٹ” کو ظاہر کرتا ہے۔برک نے ABC کو بتایا، طاقت کا اندازہ اس بات سے نہیں لگایا جاتا کہ آپ کتنے لوگوں کو تباہ کر سکتے ہیں یا کتنے بچوں کو بھوکا چھوڑ سکتے ہیں۔ہم نے جو کچھ ان کے اقدامات میں دیکھا ہے وہ اسرائیل کو دنیا سے مزید الگ تھلگ کرنے کا عمل ہے، اور یہ ان کے مفاد میں بھی نہیں ہے۔یہ بیانات اس وقت سامنے آئے جب کینبرا نے گزشتہ ہفتے فلسطینی ریاست کو تسلیم کرنے کا اعلان کیا تھا، اس عمل میں فرانس، کینیڈا اور برطانیہ بھی شامل ہیں۔نیتن یاہو نے شدید غصے کا اظہار کرتے ہوئے البانیز پر “آسٹریلیا کے یہودیوں کو نظرانداز کرنے کا الزام لگایا۔حالیہ ایام میں دونوں ممالک کے تعلقات میں نمایاں بگاڑ آیا ہے۔
