مکائے ، 24اگست (یو این آئی) کیمرون گرین (118 ناٹ آؤٹ )، ٹریوس ہیڈ (142) اور کپتان مچل مارش (100) کی شاندار سنچریوں کے بعد کوپر کونولی کی چھ اوورمیں 22 رن کے عوض 5 وکٹ کی خطرناک گیندبازی کی بدولت آسٹریلیا نے اتوار کو تیسرے ونڈے انٹرنیشنل میچ میں جنوبی افریقہ کو 276 رنز سے شکست دے دی۔ تاہم جنوبی افریقہ نے سیریز 2-1سے جیت لی۔ 142 رنز کی شاندار اننگز کھیلنے پر ٹریوس ہیڈ کو ’پلیئر آف دی میچ‘ اور 37 رنز اور چھ وکٹیں لینے والے کیشو مہاراج کو ’پلیئر آف دی سیریز‘سے نوازا گیا۔ 432 کے ٹارگٹ پر جنوبی افریقہ کی شروعات خراب رہی اور اس نے 50 رن کے اسکورتک اپنے چار وکٹیں گنوا دیئے۔ ایڈن مارکرم (2)، ریان رکلیٹن (11)، کیپٹن ٹیمبا باوما (19) اور ٹرسٹن اسٹبس (1) آؤٹ ہوئے ۔ اس کے بعد ٹونی ڈی جارجی اور ڈیوالڈ بریوس کے درمیان پانچویں وکٹ کیلئے 57 رنز کی شراکت کا 14ویں اوور میں کوپر نے ٹونی (33) کو آؤٹ کرتے ہوئے خاتمہ کیا۔ اس کے بعد بریوس (49)، ویان مولڈر (5)، کوربن بوش (17)، کیشو مہاراج (2) کو کوپر کونولی نے تیزی سے آؤٹ کرکے میچ میں آسٹریلیا کو فتح کے زینہ تک پہنچایا۔ 25ویں اوور کی پانچویں گیند پر ایڈم زمپا نے وینا مفاکا (0) کو آؤٹ کر کے جنوبی افریقہ کی اننگز 155 کے اسکور پر سمیٹ دی۔ آسٹریلیا کیلئے کوپر کونولی نے چھ اوورز میں 22 رنز دے کر پانچ وکٹیں حاصل کئے۔ کوپر کونولی ایک روزہ میچ میں پانچ وکٹیں لینے والے سب سے کم عمر آسٹریلیائی کھلاڑی بن گئے ! زیویئر بارٹلیٹ اور شان ابیٹ کو دو، دو وکٹ ملے ۔ اس سے قبل آسٹریلیا نے ٹاس جیت کر پہلے بیٹنگ کا فیصلہ کیا۔ ٹریوس ہیڈ اور مچل مارش کی اوپننگ جوڑی نے شاندار آغاز کرتے ہوئے پہلے وکٹ کیلئے 250 رنز کی شراکت داری کی۔ 35ویں اوور میں مہاراج نے ٹریوس ہیڈ کو آؤٹ کر کے اس شراکت کا خاتمہ کیا۔ ٹریوس نے 103 گیندوں میں 17 چوکوں اور پانچ چھکوں کی مدد سے (142) رنز بنائے ۔ 37ویں اوور میں سینوران متھوسمی نے مارش کو آؤٹ کر کے جنوبی افریقہ کو دوسری کامیابی دلائی۔ مارش نے 106 گیندوں میں چھ چوکوں اور پانچ چھکوں کی مدد سے 100رنز بنائے ۔ اس کے بعد کیمرون گرین اور ایلکس کیری کی جوڑی نے دھماکہ خیز بلے بازی کا مظاہرہ کیا اور مقررہ 50 اوورز میں ٹیم کا اسکور 431/2 تک پہنچا دیا۔ گرین نے 47 گیندوں میں سنچری مکمل کی اور 55 گیندوں میں آٹھ چھکوں اور چھ چوکوں کی مدد سے 118 پر ناٹ آؤٹ رہے۔ ایلکس 37گیندوں پر 7 چوکوں کی مدد سے 50 پر ناٹ آؤٹ رہے۔
