ایڈیلیڈ۔2 ڈسمبر (سیاست ڈاٹ کام )آسٹریلیا نے ڈیوڈ وارنر کی شاندار ٹرپل سنچری کے بعد مچل اسٹارک اور نیتھن لائن کی بہترین بولنگ کی بدولت پاکستان کو سیریز کے دوسرے ٹسٹ میچ میں شکست دے اننگز کی شکست دیکر 0-2 سے کلین سوئپ مکمل کر لیا۔ایڈیلیڈ میں کھیلے گئے سیریز کے دوسرے ٹسٹ میچ کے چوتھے دن کا آغاز پاکستانی ٹیم نے 39 رنز پر 3 کھلاڑیوں کے نقصان سے کیا تو شان مسعود 14 اور اسد شفیق 8 رنز پر کیریز پر موجود تھے۔ ابتدائی طور پر دونوں نے ٹیم کو سہارا دیا اور ٹیم کی سنچری مکمل کی۔ دونوں نے چوتھی وکٹ کے لئے 103رنز کی شراکت قائم کی لیکن 123 کے اسکور پر ٹیم کی چوتھی وکٹ کر گئی۔ آسٹریلیائی اسپنر نیتھن لائن نے نصف سنچری بنانے والے کھلاڑی شان مسعود کو پویلین کی راہ دکھائی اور اس کے بعد اسد شفیق بھی 154 کے مجموعی اسکور پر 57 رنز بنا کر آف اسپنر کو وکٹ دے بیٹھے۔ 154 رنز پر آدھی ٹیم کے آؤٹ ہونے کے بعد افتخار احمد اور محمد رضوان نے ٹیم کا اسکور آگے بڑھایا، تاہم ٹیم کی ڈبل سنچری مکمل ہونے کے ساتھ ہی 201 رنز کے مجموعی اسکور پر افتخار احمد بھی 27 رنز پر آوٹ ہوگئے۔ پہلی اننگز میں سنچری بنانے والے یاسر شاہ کی ہمت 13رنز پر جواب دے گئی جبکہ شاہین شاہ آفریدی بھی اس مرتبہ صرف ایک رن بنا سکے۔ محمد رضوان نے آسٹریلیائی بولنگ کے سامنے کچھ دیر تک مزاحمت کی لیکن جوش ہیزل ووڈ نے ان کی بھی وکٹیں بکھیرکر اپنی ٹیم کو فتح کی دہلیز تک پہنچا دیا۔ 239 کے مجموعی اسکور پر محمد عباس رن آؤٹ ہوکر پویلین لوٹ گئے اور اس کے ساتھ ہی آسٹریلیا نے پاکستان کو میچ میں اننگز اور48 رنز سے شکست دے کر سیریز میں بھی 0-2 سے کلین سوئپ مکمل کر لیا۔ آسٹریلیا کی جانب سے نیتھن لائن نے عمدہ بولنگ کرتے ہوئے 5 وکٹیں لیں جبکہ ہیزل ووڈ کے حصے میں تین وکٹیں آئیں۔ ڈیوڈ وارنر کو ان کی شاندار ٹرپل سنچری پر میچ کا بہترین کھلاڑی قرار دیا گیا اور سیریز میں سب سے زیادہ رنز بنانے پر وہ مین آف دی سیریزکا ایوارڈ بھی لے اڑے۔ واضح رہے کہ آسٹریلیا کی ٹیم نے ڈیوڈ وارنر کے 335 رنز کی بدولت 3 کھلاڑیوں کے نقصان پر 589 رنز بناکر پہلی اننگز ڈکلیئر کردی تھی، جس کے جواب میں پاکستانی ٹیم اپنی پہلی اننگز میں 302 رنز پر آؤٹ ہوکر فالوآن کا شکار ہوگئی تھی۔یادرہے کہ پاکستانی ٹیم کے اس دورہ آسٹریلیا کیلئے بہت کچھ تبدیلیا ں کی گئی تھیں جس میں خاص کر کپتان کی تبدیلی اہم ہے۔ سرفراز کی مسلسل ناقص کارکردگی کے بعداظہر علی کو ٹسٹ ٹیم کا کپتان بنایاگیا تھا جوکہ انفرادی طور پر بیٹنگ میں ناکام ہونے کے علاوہ مجموعی طور پر وہ ٹیم کو شرمناک ناکامیوں سے محفوظ نہ رکھ سکے ۔
