کینبرا۔4 فروری (سیاست ڈاٹ کام ) آسٹریلیا نے کینبرا ٹسٹ میں سری لنکا کو 366 رنز سے شکست دے کر دو ٹسٹ مقابلوںکی سیریز میں کلین سوئپ کر دیا۔ آسٹریلیائی دارالحکومت کینبرا میں کامیابی کیلئے سری لنکائی ٹیم کے سامنے 516 رنز کا ہمالیائی ہدف تھا، تاہم 17 رنز بغیر کسی نقصان سے ٹیم نے چوتھے دن کا کھیل شروع کیا۔ مچل اسٹارک اور کیمنز نے مہمان کھلاڑیوں کو زیادہ مہلت ہی نہ دی ، صرف 149 رنز پر پوری ٹیم کو ڈھیر کردیا۔سری لنکا کے مینڈس 42 اور تھریمانے 30 رنز کے ساتھ نمایاں رہے۔آسٹریلیائی بولرکمینز نے 3 کھلاڑیوں کو آوٹ کیا، مچل اسٹارک نے دوسری اننگز میں بھی 5 اورمیچ میں 10 وکٹیں حاصل کیں۔ 366 رنز کی فتح کے ساتھ میزبان آسٹریلیا نے دو ٹسٹ کی سیریز بھی 2-0 سے جیت لی۔یاد رہے کہ ہندوستان کے خلاف شکست کے بعد آسٹریلیا نے کسی قدر کمزور سری لنکا کے خلاف جامع مظاہروں کے ذریعہ یہ کامیابی حاصل کی ہے۔
