ملبورن ۔ 6 ڈسمبر (سیاست ڈاٹ کام) کرکٹ آسٹریلیا نے بی سی سی آئی سے درخواست کی ہیکہ وہ ہندوستان کے دورہ آسٹریلیا 2021ء کے دوران ایک سے زائد ڈے نائیٹ ٹسٹ میں شرکت کرے۔ ہندوستان کو 2021ء میں آسٹریلیا کا دورہ کرنا ہے جہاں وہ تین مقابلوں کی ونڈے سیریز بھی کھیلے گی۔ آسٹریلیا اور ہندوستان کے بورڈس حکام اس ضمن میں ایک اجلاس بھی منعقد کریں گے۔ ای ایس پی این کرک انفو کی رپورٹ کے بموجب کرکٹ آسٹریلیا اس بات کی حمایت کرتا ہیکہ ہندوستان جس نے بنگلہ دیش کے خلاف کولکتہ میں پہلے ڈے نائیٹ ٹسٹ کھیلنے کے علاوہ اس میں کامیابی حاصل کی ہے اب وہ آسٹریلیا کے خلاف بھی ایک سے زائد ڈے نائیٹ ٹسٹ کھیلے۔ کرکٹ آسٹریلیا کا وفد جس کی قیادت چیرمین ایرل ایڈنس کررہے ہیں، وہ آئندہ برس جنوری میں ہندوستان کی آسٹریلیا کے خلاف شروع ہونے والی تین ونڈے مقابلوں کی سیریز کے دوران بی سی سی آئی عہدیداروں سے ملاقات کریں گے اور امید کی جارہی ہیکہ اس ملاقات میں ہندوستان سے ایک سے زائد ڈے نائیٹ ٹسٹ کھیلنے کی درخواست کی جائے گی۔ کرکٹ آسٹریلیا کے چیف ایگزیکیٹیو کیون رابرٹس نے اے بی سی ریڈیو سے اپنی حالیہ گفتگو کے دوران کہا تھا کہ چار ٹسٹ مقابلوں کی سیریز کے دوران ایک سے زائد ڈے نائیٹ ٹسٹ پر توجہ مرکوز کی جارہی ہے۔ انہوں نے تو یہاں تک کہا کہ اگر چار مقابلوں کی ٹسٹ سیریز ہورہی ہے تو چاروں کے چاروں مقابلے ڈے نائیٹ ہونے چاہئے۔ بی سی سی آئی کے صدر سورو گنگولی کے عہدہ سنبھالنے کے ساتھ ہی انہوں نے ہند ۔ بنگلہ دیش ڈے نائیٹ ٹسٹ کو یقینی بنایا تھا اور اس مقابلہ میں ہندوستان نے باآسانی کامیابی حاصل کی تھی۔ 2021ء کے دورہ آسٹریلیا کے موقع پر اب ہندوستان کے ساتھ ڈے نائیٹ ٹسٹ کے امکانات بھی روشن ہورہے ہیں۔
