سڈنی، 25 فروری (آئی اے این ایس)کرکٹ آسٹریلیا نے اعلان کیا ہے کہ آسٹریلیا اگست میں بنگلہ دیش کے خلاف دو ٹسٹ میچوں کی سیریز کی میزبانی کرے گا۔ یہ 2003 کے بعد پہلا موقع ہوگا جب بنگلہ دیشی ٹیم ٹسٹ سیریز کے لیے آسٹریلیا کا دورہ کرے گی۔سیریز کا پہلا ٹسٹ 13 سے 17 اگست تک مراّرا اسٹیڈیم، ڈارون میں کھیلا جائے گا۔ ڈارون میں 2004 کے بعد پہلی بار کوئی ٹسٹ میچ منعقد ہوگا، جب آسٹریلیا نے وہاں سری لنکا کرکٹ ٹیم کی میزبانی کی تھی۔ ڈارون نے 2003 میں بنگلہ دیش اور 2004 میں سری لنکا کی میزبانی کی تھی، تاہم 2008 کے بعد یہاں کوئی بین الاقوامی میچ نہیں کھیلا گیا تھا، یہاں تک کہ گزشتہ سال اگست میں جنوبی افریقہ کرکٹ ٹیم نے دو ٹی20 میچز کھیلے۔سیریز کا دوسرا اور آخری ٹسٹ 22 سے 26 اگست تک گریٹ بیریئر ریف ایرینا، میکے میں کھیلا جائے گا۔ میکے پہلی بار کسی ٹسٹ میچ کی میزبانی کرے گا اور آسٹریلیا کا 12واں مقام بن جائے گا جہاں ٹسٹ کرکٹ کھیلی جائے گی۔بنگلہ دیش نے آخری بار 2017 میں ڈھاکہ میں آسٹریلیا کے خلاف تاریخی فتح حاصل کی تھی اور اس کے بعد دونوں ٹیموں کے درمیان طویل فارمیٹ میں مقابلہ نہیں ہوا۔ یہ سیریز آئی سی سی ورلڈ ٹسٹ چمپئن شپ کے 2025 تا 2027 سائیکل کا حصہ ہوگی، جس میں آسٹریلیا اس وقت آٹھ میں سے سات فتوحات کے ساتھ سرفہرست ہے۔کرکٹ آسٹریلیا کے چیف ایگزیکٹو ٹوڈ گرین برگ نے کہا کہ شمالی آسٹریلیا میں ٹسٹ کرکٹ کی واپسی پر وہ خوش ہیں اور بنگلہ دیش کے خلاف دلچسپ سیریز کی توقع رکھتے ہیں۔ ان کے مطابق مصروف بین الاقوامی کیلنڈر کے باوجود اگست میں عالمی معیار کی سہولیات کی دستیابی آسٹریلیا کے لیے خوش آئند ہے۔ انہوں نے مراّرا اسٹیڈیم اور گریٹ بیریئر ریف ایرینا کو حالیہ برسوں میں بین الاقوامی کرکٹ کے لیے بہترین مقامات قرار دیا۔ بنگلہ دیش کے خلاف سیریز کے بعد آسٹریلیا تین ٹسٹ میچوں کی سیریز کے لیے جنوبی افریقہ کا دورہ کرے گا، جبکہ سال کے اختتام پر نیوزی لینڈ کرکٹ ٹیم کی میزبانی کرے گا۔بنگلہ دیش کیلئے یہ سیریز اہم ہوگی ۔سیریز کا شیڈول:پہلا ٹسٹ: 13 تا 17 اگست، مراّرا اسٹیڈیم، ڈارون۔دوسرا ٹسٹ: 22 تا 26 اگست، گریٹ بیریئر ریف ایرینا، میکے۔
