ممبئی، 7 ستمبر (یو این آئی) گلوکارہ آشا بھونسلے اپنی پرکشش آواز کے لئے مشہور ہیں اور وہ تقریباًچھ دہائیوں سے فلم انڈسٹری کو 12 ہزار سے زائد دلکش اور مدہوش کرنے والے نغمات دے چکی ہیں۔ ہندی کے علاوہ انہوں نے مراٹھی، بنگالی، گجراتی، پنجابی، تمل، ملیالم اور انگریزی زبان میں بھی نغمہ سرائی کی ہے ۔ آشا بھونسلے کی پیدائش 8ستمبر 1933 کو مہاراشٹر کے سانگلی گاؤں میں ہوئی۔ ان کے والد پنڈت دینا ناتھ منگیشکر مراٹھی رنگ منچ سے جڑے ہوئے تھے ۔ جب وہ محض نو سال کی تھیں ان کے والد کا انتقال ہوگیا تھا اور خاندان کی معاشی ذمہ داری کو سنبھالنے کے لئے انہوں نے اپنی بڑی بہن لتا منگیشکر کے ساتھ فلموں میں اداکاری کے ساتھ ساتھ گانا بھی شروع کردیا تھا۔ آشا بھونسلے نے اپنا پہلا نغمہ 1948 میں فلم چنریا میں گیت ‘ساون آیا ’ گایا۔آشا بھونسلے نے سولہ برس کی عمرمیں اپنے خاندان کی مرضی کے خلاف اپنی عمر سے بڑے شخص گنپت راؤ بھونسلے سے شادی کرلی ۔ یہ شادی زیادہ کامیاب نہیں رہی اور آخرکار وہ ممبئی سے واپس اپنے گھر پونے آگیئں تب تک گیتا دت، شمشاد بیگم اور لتا منگیشکربطور گلوکارہ اچھی خاصی شناخت قائم کرچکی تھیں۔ سال 1957 میں پروڈیوسر ، ڈائرکٹر بی آر چوپڑہ کی ہدایت کاری اور موسیقار او پی نیئر کی موسیقی میں بنی فلم ‘نیا دور ’ آشا بھونسلے کے فلمی کیریئر کے لئے اہم موڑ ثابت ہوئی۔ سال 1966 میں فلم ‘تیسری منزل ’ میں انہوں نے آر ڈی برمن کی موسیقی میں ‘آجا آجا میں ہوں پیار تیرا’ نغمہ گایا جس سے انہیں بہت شہرت ملی۔ 60اور 70کی دہائی میں آشا بھونسلے کی آواز کو ہندی فلموں کی مشہور ڈانسر اداکارہ ہیلن کی آواز سمجھی جاتی تھی ۔ اس کے علاوہ انہوں نے تقریباً ہر ہیروئن کیلئے اپنی آواز دی ۔ انہوں نے د وسری شادی موسیقار آر ڈی برمن سے کی تھی جن کا دیہانت ہوئے بھی کافی عرصہ گزرچکا ہے ۔
