کراچی ۔ پاکستان کرکٹ ٹیم کے سابق کپتان شاہد آفریدی پاکستان سوپر لیگ (پی ایس ایل) کے چھٹے ایڈیشن کے ملتوی ہونے پر پاکستان کرکٹ بورڈ (پی سی بی) پر برس پڑے۔انھوں نے کہا کہ ایونٹ کو ملتوی نہیں کرنا چاہیے تھا، پی سی بی کے پاس پلان بی نہیں تھا۔ان خیالات کا اظہار انھوں نے لاہور میں شاہد آفریدی فاؤنڈیشن اورگورنر پنجاب چوہدری محمد سرور کی سرور فاؤنڈیشن کے درمیان مفاہمت کی یادداشت پر دستخط کرنے کی تقریب کے موقع پر کیا۔سابق کپتان نے کہا کہ پی ایس ایل کو ملتوی کرنے کا فیصلہ نہیں کرنا چاہیے تھا۔شاہد آفریدی نے یہ بھی کہا کہ پی ایس ایل پاکستان کا بہت بڑا برانڈ ہے، لیکن پلان بی نہیں بنایا گیا۔سابق کپتان نے سلیکشن کمیٹی کے معاملات کو بھی تنقید کا نشانہ بنایا۔انھوں نے کہا کہ سلیکٹر، کوچ اور کپتان مل کر ٹیم بناتے ہیں، ان کی باتیں باہر آنا غلط ہے۔دورہ افریقہ کیلئے ٹیم کے انتخاب پر بات کرتے ہوئے شاہد نے کہا کہ ٹیم کا انتخاب سمجھ میں نہیں آیا۔یاد رہے پاکستان سوپر لیگ کورونا کی وجہ سے درمیان میں ہی ملتوی کردیا گیا جس کے بعد بورڈ کے انتظامات پر مختلف گوشوں سے تنقید کی جارہی ہے۔
