عہدے کے غلط استعمال اور متعلقہ سروس رولز کی خلاف ورزی کا الزام
نئی دہلی :مرکزی وزارت داخلہ نے سینٹرل بیورو آف انویسٹی گیشن (سی بی آئی) کے سابق ڈائریکٹر آلوک ورما کے خلاف عہدے کے غلط استعمال اور متعلقہ سروس رولز کی خلاف ورزی کے خلاف تادیبی کارروائی کی سفارش کی ہے۔ حکام نے چہارشنبہ کو یہ معلومات دی ہیں۔پی ٹی آئی کے مطابق انہوں نے کہاہے کہ مرکزی وزارت داخلہ نے ورما کے خلاف ضروری تادیبی کارروائی کرنے کے لیے سی بی آئی کی نوڈل وزارت پرسنل اینڈ ٹریننگ (ڈی او پی ٹی) کو لکھا ہے۔عہدیداروں نے کہاہے کہ اگر ورما کے خلاف کارروائی کی منظوری دی جاتی ہے تو ان کی پنشن اور ریٹائرمنٹ کے فوائد پر عارضی یا مستقل طور پر پابندی لگ سکتی ہے۔ورما ، ریٹائرڈ 1979 بیاچ انڈین پولیس سروس (آئی پی ایس) کے افسر ہیں ، نے سی بی آئی میں خدمات انجام دیتے ہوئے بدعنوانی کے الزامات پر اپنے ماتحت گجرات کیڈر کے آئی پی ایس افسر راکیش آستھانہ سے جھگڑا کیا تھا۔ ورما اوراستھان دونوں آئی پی ایس عہدیدار ہیں اور دونوں نے ایک دوسرے کے خلاف بدعنوانی کے الزامات عائد کئے ہیں ۔ آستھانہ اب دہلی کے پولیس کمشنر ہیں۔ ایک سینئر عہدیدار نے کہاہے کہ ورما پر اپنے عہدے کا غلط استعمال کرنے اور سروس رولز کی خلاف ورزی کا الزام ہے۔ وزارت داخلہ نے اس کے خلاف ضروری کارروائی کی سفارش کی ہے۔ وزارت داخلہ آئی پی ایس افسران کے لیے کیڈر کنٹرولنگ اتھارٹی ہے۔
