حیدرآباد ۔ 3 مارچ (سیاست نیوز) تلنگانہ میں آل انڈیا انسٹیٹیوٹ آف میڈیکل سائنس ایم بی بی ایس یو جی کورس کے آغاز کے ساتھ تعلیمی سال 2019-20ء سے تعلیم شروع کررہا ہے لیکن ابھی یہ طئے نہیں ہوا ہیکہ عارضی کیمپس کہاں قائم ہو جہاں سال اول کی کلاسیس شروع ہوں گی۔ تلنگانہ حکومت نے مستقل عمارت کی تعمیر کیلئے بی بی نگر میں تقریباً دوسو ایکڑ اراضی الاٹ کی ہے۔ فی الحال محکمہ صحت نے سال اول کی تعلیم شروع کرنے کیلئے چار مقامات تجویز کئے ہیں جن میں بی بی نگر کا موجودہ مقام جہاں یہ ادارہ قائم کیا گیا اور گاندھی ہاسپٹل اور بھونگیر کے دو بند انجینئرنگ کالجس شامل ہیں۔
