حیدرآباد27نومبر (یو این آئی) آندھراپردیش کے ضلع چتور میں زلزلے کے ہلکے جھٹکے محسوس کئے گئے ۔یہ جھٹکے دو دن بعد دوبارہ محسوس کئے گئے ۔اطلاعات کے مطابق ایس گولہ پلی، کرشنانگرکالونی، پلی کُپم، گڈورو،پداگری پلی میں یہ جھٹکے محسوس کئے گئے جس سے ان مواضعات میں مقیم افراد خوفزدہ ہوکر گھروں سے باہر نکل آئے اور جان بچانے کھیتوں کی طرف نکل پڑے ۔ان کے کھیت، جنگلاتی علاقوں کے قریب ہیں۔اطلاع پر عہدیداروں نے عوام کو چوکس کرتے ہوئے کہا کہ وہ جنگلاتی علاقہ کی طرف نہ جائیں کیونکہ یہ مزید خطرناک ہوسکتا ہے ۔ان جھٹکوں کے نتیجہ میں کسی جانی یامالی نقصان کی کوئی اطلاع نہیں ملی ہے البتہ مکانات کی دیواروں میں دراڑیں پیدا ہوگئیں۔ عہدیداروں نے ان مواضعات کا دورہ کیا اور صورتحال سے واقفیت حاصل کی۔انہوں نے ان مواضعات میں رہنے والوں سے بات بھی کی اور عوام کو مشورہ دیا کہ وہ فکرمند نہ ہوں۔مقامی افرادنے کہاکہ زمین سے خوفناک آوازیں بھی آرہی تھیں۔
