جدہ ( عرفان محمد) :آندھراپردیش کے نوجوان اور روشن خیال سفارت کاروں میں سے ایک فہد احمد خان سوری کو جدہ میں ہندوستان کا قونصل جنرل مقرر کیا گیا ہے۔فہد احمد خاں 2014 بیچ کے IFS افسر ہیں اور اس وقت نئی دہلی میں وزارت تجارت میں خدمات انجام دے رہے ہیں جہاں وہ مشرق وسطیٰ اور شمالی افریقی ممالک، زیادہ تر عرب ممالک کے ساتھ ہندوستان کے تجارتی معاملات کی ذمہ داری نبھا رہے ہیں ۔لندن میں سابق بینکر ‘ بزنس مینجمنٹ اور انجینئرنگ کے گریجویٹ فہد احمد خان آندھرا پردیش کے کرنول کے رہنے والے ہیں اور ان کا تعلق معروف کاروباری خاندان سے ہے۔ ان کے والد مرحوم جمیل احمد خان شہر کے معروف تاجر کے طور پر جانے جاتے تھے۔نئے قونصل جنرل خلیجی خطہ میں تارکین وطن کے معاون کے طور پر جانے جاتے ہیں کیونکہ انھوں نے پہلے کویت میں کام کیا تھا جہاں انہوں نے کمیونٹی کے دل جیت لیے تھے۔ وہ کورونا بحران کے دوران تارکین وطن کی واپسی میں بڑھ چڑھ کر حصہ لے رہے تھے۔ذرائع کے مطابق، موجودہ قونصل جنرل محمد شاہد عالم کی مدت ملازمت ختم ہو چکی ہے اور ان کا تبادلہ کر کے لندن میں ہندوستانی ہائی کمیشن میں تعینات کیا جا رہا ہے۔ شاہد عالم کو عام طور پر ماس ڈپلومیٹ کہا جاتا ہے۔ دنیا کے اس حصہ میں صرف مسلمان سفارت کار ہی حج آپریشن میں شامل مشن کے طور پر تعینات ہیں۔
