حیدرآباد۔/10 مئی، ( سیاست نیوز) پولیس کمشنر حیدرآباد انجنی کمار نے افضل گنج پولیس اسٹیشن سے وابستہ دو پولیس کانسٹبلس کو ایک آٹو ڈرائیور سے جبراً رقم وصول کرنے کے الزام میں معطل کردیا۔ ڈی پانچا مکیش اور بی سریش جو افضل گنج پولیس اسٹیشن کے بلو کولٹس پٹرولنگ پارٹی میں خدمات انجام دے رہے ہیں شہر کے علاقہ جامباغ معظم جاہی مارکٹ پر ایک آٹو ڈرائیور جو ضروری اشیاء منتقل کررہا تھا کو روک کر مبینہ طور پر رقم وصول کی۔ اس حرکت کو بعض افراد نے ویڈیو میں قید کرکے اسے سوشیل میڈیا پر وائر کردیا۔ اس بات کا علم ہونے پر پولیس کمشنر نے اس معاملہ کی فی الفور تحقیقات کروائی اور دونوں پولیس کانسٹبلس کو معطل کرنے کے احکامات جاری کئے ہیں جبکہ انسپکٹر پولیس افضل گنج پولیس اسٹیشن کو بھی چارج میمو جاری کیا گیا ہے۔ پولیس کمشنر نے اپنے ٹوئیٹ کے ذریعہ بتایا کہ بے قاعدگی اور بے ضابطگی کو ہرگز برداشت نہیں کیا جائے گا اور اس قسم کی حرکت میں ملوث پولیس ملازمین کے خلاف سخت کارروائی کی جائے گی۔
