اسلام آباد : وزیر اعظم شہباز شریف نے پنجاب کے 20 حلقوں کے عوام سے اپیل کی ہے کہ وہ بھرپور جذبے کے ساتھ گھروں سے نکلیں، ووٹ کا حق استعمال کریں، آپ کے مستقبل کا دارومدار اس پرچی پر ہے۔اتوار کواپنے ٹویٹ میں انہوں نے کہا کہ بزرگ، مائیں اور مردوخواتین آج فیصلہ دیں کہ پنجاب اور پاکستان میں خدمت کا راج ہوگا، نالائقی، جھوٹ اور کرپشن کا نہیں۔انہوں نے کہاکہ جھوٹ بولنے ، 100یونٹ مفت بجلی کی سہولت چھیننے والوں کے خلاف عوام واضح فیصلہ سنائیں۔انہوں نے کہا کہ ووٹ ڈالتے ہوئے عمران نیازی حکومت کی کرپشن،معاشی تباہی کا ضرور سوچیے گا۔وزیراعظم نے اپنے ایک بیان میں کہا کہ پاکستان پی ٹی آئی کے دور میں اپنی منزل سے دور ہوگیا، اس کا اظہار ووٹ سے کرنا ہے۔انہوں نے کہا کہ پنجاب کو پونے4 سال بدترین گورننس کا نشانہ بنایا گیا، شہریوں کو مفت ادویات اور طلباء کو وظائف سے محروم کیا گیا۔وزیراعظم کا کہنا تھا کہ سرکاری اسامیوں اور تبادلوں کی کھلے عام خرید و فروخت کی گئی، شہری سہولیات کی حالت ابتر اور لاقانونیت عروج پر رہی۔ان کاکہنا تھا کہ پنجاب کی جو حالت کی گئی، وہ پنجاب کیلوگوں کی توہین سے کم نہیں، ووٹ کی طاقت سے انتشار، نفرت اور تقسیم کی سیاست کو مسترد کریں،وزیر اعظم کا مزید کہنا تھا کہ ایک شخص کی اناء ، اندازِ سیاست اور نااہلی نے معاشرے کے حسن کو تہ و بالا کرکے رکھ دیا، اپنا ووٹ قومی ترقی اور اپنے بچوں کے روشن مستقبل کیلئیڈالیں، مجھے آپ کی قوتِ انتخاب پر پورا بھروسہ ہے۔
