نئی دہلی ۔ کانگریس کے سابق صدر راہول گاندھی نے اپنے ٹوئٹ میں بھگوت گیتا اور رام چرت مانس کے طرز پر ‘کرم’ کا ذکر کرتے ہوئے آج رافیل جنگی طیارے سودے میں وزیراعظم نریندر مودی کا نام لئے بغیر انہیں ہدف تنقید بنایا اور کہا کہ آپ جو بھی کریں گے اس کا خمیازہ بھگتنا پڑے گا۔ فرانسیسی میڈیا کے رافیل جنگی طیارے کے سودے میں ایک ہندوستانی بچولئے کے رشوت لینے کے معاملے کے انکشاف کرنے کے بعد کانگریس حکومت پر حملہ آور ہوگئی ہے اور پارٹی نے اس معاملے میں پیر کو خصوصی پریس کانفرنس کرکے مودی سے ملک کی عوام کو وضاحت پیش کرنے اور اصل حقائق بتاکر اس پورے معاملے کی جامع تحقیقات کا مطالبہ کیا تھا۔ راہول نے رافیل معاملے میں اس نئے انکشافات کے سلسلے میں حکومت پر حملہ کرتے ہوئے ٹوئٹ کیا کہ کرم کئے کرائے کا بہی کھاتہ ہے ۔ اس سے کوئی نہیں بچ سکتا۔
