لکھنؤ: چوری کے الزامات میں پوچھ گچھ کے دوران پولیس حراست میں موت کے بعد متوفی صفائی کرمچاری ارون والمیکی کے اہل خانہ سے ملنے آگرہ جانے پر بضد کانگریس جنرل سکریٹری پرینکا گاندھی واڈرا کو لکھنؤ پولیس نے حراست میں لے لیا۔پارٹی ذرائع کے مطابق پرینکا کو آج شام آگرہ ایکسپریس وے انٹری پوائنٹ پر حراست میں لیا گیا۔ انہیں پولیس ساتھ لے گئی ۔ بعد ازاں پولیس نے انہیں آگرہ کا سفر کرنے کی اجازت دے دی ۔ 3 ا کتوبر کو لکھیم پور میں کسانوں کے غمزدہ ارکان خاندان سے ملاقات کیلئے سفر کے دوران بھی پرینکا کو سیتا پور میں زیر حراست رکھا گیا تھا ۔ پرینکا نے پولیس کے رویہ کی مذمت کرتے ہوئے ٹوئٹ کیاکہ ارون والمیکی کی موت پولیس حراست میں ہوئی ہے ۔ ان کا کنبہ انصاف مانگ رہا ہے ۔ میں پریوار سے ملنے جارہی ہوں۔ اترپردیش حکومت کوڈر کس بات کا ہے ،کیوں مجھے روکا جارہا ہے ۔ آج بھگوان والمیکی کی جینتی ہے ۔ وزیر اعظم نے مہاتما بدھ پر بڑی باتیں کہی ہیں لیکن ان کے پیغامات پر حملہ کررہے ہیں۔اسمبلی انتخابات سے پہلے سڑک پر اترکر کانگریس میں جان ڈالنے کی لگاتار کوشش کررہی پرینکا نے آگرہ کے واقعہ کی آج صبح مذمت کرتے ہوئے ریاست کی یوگی حکومت کو ایک بار پھر نظم ونسق کے مسئلے پر گھیرا۔انہوں نے ٹوئٹ کیا کہ کسی کو پولیس تحویل میں پیٹ پیٹ کر مار دینا کہاں کاانصاف ہے ۔
