کاغذ نگر میں امام و خطیب جامع مسجد حافظ عمر رضا کا بیان
کاغذ نگر۔/3 مارچ، ( سیاست ڈسٹرکٹ نیوز) کاغذ نگر مستقرمیں آج ائمہ اور مسلمانوں کی جانب سے اردو اخباری نمائندوں سے بات چیت کرتے ہوئے کہا کہ ریاستی حکومت نے ائمہ اور موذنین کے اعزازیہ کی رقم کی منظوری میں کوتاہی اور تاخیر کررہی ہے جس کی وجہ سے ائمہ و مؤذنین کو کافی دشواریاں ہورہی ہیں۔ اس موقع پر جامع مسجد امام و خطیب حافظ عمر رضا، حافظ زاید احمد، امام فراز الحق، شیخ ربانی، حافظ مدثر عالم اور وزیر احمد بھی موجود تھے۔ اس موقع پر جامع مسجد امام و خطیب حافظ عمر رضا نے مقامی اردو اخباری نمائندوں سے خطاب کرتے ہوئے کہا کہ ریاست تلنگانہ حکومت نے تلنگانہ کے ائمہ اور موذنین کو ہر مہینہ اعزازی رقم دیتے ہوئے کافی مدد کی ہے۔ لیکن تلنگانہ ریاست میں لگ بھگ 4 ہزار ائمہ اور موذنین کے اعزازیہ کی رقم کی منظوری نہیں ہوئی ہے جس کی وجہ سے ائمہ و مؤذنین میں بے چینی پائی جاتی ہے۔ فوری اس ماہ شروع ہونے والے اسمبلی اجلاس میں مزید باقی چار ہزار ائمہ اور مؤذنین کیلئے بھی اعزازی رقم کی منظوری کا چیف منسٹر کے سی آر، وزیر داخلہ محمود علی اور وقف بورڈ چیرمین محمد سلیم سے پرزور مطالبہ کیا گیا۔ لگ بھگ چار ہزار ائمہ اور موذنین کیلئے بھی اعزازی رقم کیلئے اس اسمبلی اجلاس میں بجٹ کو منظورکرتے ہوئے ائمہ و موذنین کی پسماندگی کودور کریں کیونکہ گزشتہ کئی مہینوں سے ائمہ و موذنین کے اعزازیہ کی رقم منظور نہ ہونے پر وہ دفاتر کے چکر لگاتے ہوئے تھک چکے ہیں۔ اس لئے جس طرح چار سال قبل منظور کئے گئے ائمہ اور موذنین کے اعزازیہ کی رقم کی طرح 4 ہزار باقی ائمہ و موذنین کو اعزازیہ کی رقم منظور کرتے ہوئے ائمہ و موذنین کی پسماندگی دور کرنے کا مطالبہ کیا گیا ورنہ ریاستی حکومت کے وعدے جھوٹے ثابت ہوں گے۔ اب دیکھنا یہ ہے کہ 6 مارچ سے شروع ہونے والے اسمبلی بجٹ میں ائمہ اور مؤذنین کے اعزازیہ کی رقم اور بجٹ میں اضافہ ہوگا یا نہیں یہ تو آنے والا وقت ہی بتائے گا۔
