دبئی۔10 مئی (سیاست ڈاٹ کام)متحدہ عرب امارات کی اتحاد ایرویز نے ابوظہبی امارت کے اندرونی شہروں میں ون وے ٹرپوں کا آغاز کردیا ہے تاکہ غیرملکی شہریوں کی امارات میں واپسی میں مدد مل سکے۔فضائی کمپنی کے ترجمان نے پریس بیان میں کہا کہ مسافروں کو متعلق ویب سائٹ کے ذریعے متحدہ عرب امارات میں مقیم غیرملکیوں کی شناخت کے لیے قائم اتھارٹی کی طرف سے منظوری کے بعد سفر کی درخواست دینا ہوگی۔انہوں نے کہا کہ درخواست کی منظوری ملنے پر شناخت اور شہریت کی فیڈرل اتھارٹی کے ای میل کے ذریعہ ایک خاص کریڈٹ نمبر بھیجا جائے گا ، جو مسافر کو بکنگ کے وقت اتحاد ایر ویز کو فراہم کرنا ہوگا۔ترجمان نے مزید کہا کہ شناخت اور شہریت کے لیے فیڈرل اتھارٹی سے منظوری حاصل کرنے کے بعد آپ اتحاد ایر ویز کال سنٹر پر کال کرسکتے ہیں اور امارات کے لئے واپسی کی پرواز بک کرسکتے ہیں۔ترجمان نے زور دے کر کہا کہ مسافروں کے پاس امارات میں اقامہ اور قانونی ویزا ہونا ضروری ہے۔ اس کے ساتھ ساتھ شناخت اور شہریت کی فیڈرل اتھارٹی کا منظوری نمبر درکار ہوگا کیونکہ اسے دوسری صورت میں متحدہ عرب امارات میں داخلے کی اجازت نہیں ہوگی۔ترجمان نے کہا کہ تمام مہمانوں کا پی سی آر ٹسٹ ہوگا اور ابوظہبی پہنچنے پر تھرمل اسکین کیا جائے گا۔ ضرورت پڑنے پر کسی بھی مسافر کو 14 دن کے لیے قرنطینہ رہنا ہوگا۔
