نئی دہلی، 30 جولائی (آئی اے این ایس) ہندوستانی اوپنرابھیشیک شرما نے آئی سی سی ٹی20 درجہ بندی میں دنیا کے نمبر ایک بیٹر کا اعزاز حاصل کرلیا ہے۔ آسٹریلیا کے ٹریوس ہیڈ، جو پچھلے ایک سال سے سرفہرست تھے، ویسٹ انڈیز کے خلاف سیریز میں حصہ نہ لینے کے باعث پہلے مقام سے محروم ہوگئے ہیں۔آسٹریلیا کے بیٹر جوش انگلس نے کیریبین میں پانچ میچوں کی سیریز میں 172 رنز (دو نصف سنچریوں سمیت) بنا کر چھ درجے ترقی کے ذریعہ 9ویں نمبر پر پہنچ گئے ہیں۔ دیگر آسٹریلوی کھلاڑیوں میں ٹم ڈیوڈ نے 12 درجے ترقی کے ساتھ 18ویں، اور کیمیرون گرین نے 64 درجے چھلانگ لگا کر24ویں نمبر پر جگہ بنائی ۔ دونوں کی یہ کیرئیر کی بہترین رینکنگ ہے۔ ویسٹ انڈیز کے برینڈن کنگ نے بھی نو درجے بہتری کے بعد 21واں مقام حاصل کرلیا ہے۔ ٹی20 بولرزکی رینکنگ میں جیکب ڈفی بدستور پہلے نمبر پر برقرار ہیں۔ انہوں نے زمبابوے میں ٹرائی سیریز جیتنے میں چھ وکٹیں لے کر اہم کردار ادا کیا۔آسٹریلیا کے فاسٹ بولر نیتھن ایلس نے سات درجے ترقی کے ساتھ 8ویں نمبر پر جگہ بنالی ہے۔
پریانش کی رانجی ٹرافی پر نظر
نئی دہلی، 30 جولائی(پی ٹی آئی) دہلی کے نوجوان بیٹر پریانش آریہ جنہوں نے آئی پی ایل اور دہلی پریمیئر لیگ میں اپنی جارحانہ بیٹنگ سے شہرت حاصل کی، اب رانجی ٹرافی میں دہلی کی نمائندگی کے لیے ریڈ بال کرکٹ پر توجہ مرکوز کر رہے ہیں۔
