دھمتری : چھتیس گڑھ میں کووڈ۔ 19 کے معاملوں میں بڑی کمی کے پیش نظر دھمتری کے کلکٹر اور ڈسٹرکٹ مجسٹریٹ پی ایس عالم نے شادی کے پروگراموں اور دیگر تقریبات میں زیادہ سے زیادہ افراد کی شرکت سے متعلق ایک نظر ثانی شدہ حکم جاری کیا ہے ۔سرکاری اطلاع کے مطابق اب زیادہ سے زیادہ 150 لوگ شادی کی تقریبات میں اور 50 افراد آخری رسومات میں شرکت کرسکیں گے ۔ فی الحال کووڈ۔ 19 معاملوں میں کمی کے پیش نظر کووڈ۔ 19 کے پروٹوکول کی سختی سے پابندی کی شرط پر شادی کے پروگراموں کی اجازت ہوگی۔حکم نامے میں کہا گیا ہے کہ ہوٹل ، شادی ہال کی گنجائش کے 50 فیصد کی حد سے مشروط زیادہ سے زیادہ 150 افراد کی اجازت دی جاسکتی ہے ۔
