نئی دہلی۔ سپریم کورٹ نے اترپردیش پنچایت انتخابات کی اتوار کو ہونے والی ووٹوں کی گنتی ٹالنے سے انکار کردیا ہے ۔جسٹس اے ا یم کھانولکر اور جسٹس ریشی کیش رائے کی بینچ نے ہفتے کی چھٹی کے باوجود آج خصوصی سماعت کرتے ہوئے ووٹوں کی گنتی کی اجازت دی ہے ۔عدالت نے ووٹوں کی گنتی کرانے کا حکم اترپردیش ریاستی الیکشن کمیشن کی جانب دئے گئے اس یقین دہانی کے بعد دیا جس میں کہا گیا ہے کہ کمیشن کورونا کی وبا سے متعلق پروٹوکول پر عمل کرتے ہوئے ووٹوں کی گنتی کرائے گا۔کمیشن کی جانب سے پیش اڈیشنل سالیسیٹر جنرل اور سینئر وکیل ایشوریا بھاٹی کی دلیلیں سننے کے بعد بینچ نے کہا،‘‘ہم کورونا سے متعلق سبھی ہدایات پر ہر حال میں عمل کرنے کی کمیشن کی یقین دہانی کے بعد ووٹوں کی گنتی ٹالنے کی اپیل خارج کرتے ہیں۔’’واضح رہے کہ الہ آباد ہائی کورٹ نے گزشتہ سات اپریل کو مقامی بلدیاتی انتخابات پر روک لگانے سے انکار کردیا تھا،جس کے خلاف سپریم کورٹ میں خصوصی اجازت عرضیاں دائر کی گئی تھیں۔عرضی گزاروں کی جانب سے وکیل شعیب عالم نے جرح کی اور کہا کہ یہ پولنگ بوتھ کورونا انفیکشن کے پھیلاؤ کی وجہ نہ بن جائیں۔
