لکھنؤ : کانگریس کی جنرل سکریٹری پرینکا گاندھی واڈرا نے اعلان کیا ہے کہ جب ان کی پارٹی اترپردیش میں اقتدار میں آئے گی تو انٹر پاس لڑکیوں کو اسمارٹ فون اور گریجویٹ طالبات کو الیکٹرانک اسکوٹی دی جائے گی۔پرینکا نے جمعرات کو ٹویٹ کیا کہ کل میں نے کچھ طالبات سے ملاقات کی۔انہوں نے بتایا کہ ان کو پڑھنے اور سیکورٹی کے لیے اسمارٹ فون کی ضرورت ہے۔ انہوں نے کہا کہ مجھے خوشی ہے کہ آج پردیش کمیٹی کی رضامندی سے یوپی کانگریس نے فیصلہ کیا ہے کہ اگر حکومت بنتی ہے تو انٹر پاس لڑکیوں کو اسمارٹ فون اور گریجویٹ لڑکیوں کو الیکٹرانک اسکوٹی دی جائے گی۔چہارشنبہ کے روز پولیس حراست میں ہلاک ہونے والے عملہ کے لواحقین سے ملنے آگرہ جاتے ہوئے پرینکا کو لکھنؤ پولیس نے آگرہ ایکسپریس وے کے ’انٹری پوائنٹ‘ پر روک لیا۔ اس دوران پرینکا نے وہاں موجود طالبات سے بات چیت کی اور ان سے پوچھا کہ کیا وہ ان کے ساتھ سیلفی لینا چاہیں گی؟ اس پر لڑکیوں نے رضامندی ظاہر کی اور موبائل فون نہ ہونے کی مجبوری بتائی جس پر کانگریس جنرل سکریٹری نے کہا کہ اگر ان کی حکومت اقتدار میں آئی تو انہیں موبائل فون دیئے جائیں گے ۔
