سدھارتھ نگر ۔19جنوری ۔(سیاست ڈاٹ کام)آئندہ یوم جمہوریہ کے موقع پر اترپردیش کے مہاراج گنج، سدھارتھ نگر ، بلرام پور، شراوستی، بہرائچ، لکھیم پور کھیری اور پیلی بھیت اضلاع کی ہمسایہ ملک نیپال سے متصل 550 کلومیٹر طویل بین الاقوامی سرحد سے دہشت گردوں کے دراندازی کے خدشہ کے پیش نظر ہائی الرٹ جاری کر کے چوکسی بڑھا دی گئی ہے ۔ سرکاری ذرائع نے اتوار کو یہاں کہا کہ بین الاقوامی سرحد کی نگرانی کیلئے تعینات سشستر سیما بل بین الاقوامی سرحد سے دونوں اطراف آنے جانے والوں پر قریب سے نظر رکھ رہی ہے ۔ ذرائع نے بتایا کہ پڑوسی ملک نیپال کو جوڑنے والے تمام کچے اور پختہ راستوں کے علاو ہ ندی اور نالوں کے راستوں کی نگرانی کیلئے بھی سکیورٹی فورس تعینات کی گئی ہیں ۔ بین الاقوامی سرحد کی نگرانی کے لئے سی سی ٹی وی کیمرے لگائے گئے ہیں اور ڈاگ اسکویڈ کی امداد بھی لی جا رہی ہے ۔
