اگرتلہ: تریپورہ کے ضلع گومتی کے ڈسٹرکٹ کورٹ نے نومبر 2021 میں ایک خاتون کی اجتماعی عصمت دری کے معاملے میں 5 لوگوں کو عمر قید کی سزا سنائی ہے ۔گومتی کی ضلعی اور سیشن عدالت نے پیر کو پانچوں ملزمین کو ان کی موت تک قید با مشقت کی سزا سنائی اور تمام مجرموں پر 60,000 روپے کا جرمانہ بھی عائد کیا۔ملزمین کو تعزیرات ہند کی دفعہ 376 (D) اور درج فہرست ذات و قبائل ( انسداد مظالم) قانون کی دفعہ 03کے تحت اجتماعی عصمت دری کیلئے قصوروار پایا گیا تھا۔ مجرموں کی شناخت تاج الاسلام، صدام حسین، ربن علی، دودھو میاں اور شمیمن حسین کے طور پر کی گئی ہے اور یہ سبھی ضلع سپاہیجالا کے سونامورا اور میلا گڑھ کے باشندے ہیں۔اسپیشل پبلک پراسکیوٹر پلٹو داس نے بتایا کہ متاثرہ خاتون واقعے کی رات اپنے شوہر کے ساتھ موٹر سائیکل پر جارہی تھی۔ اس دوران ملزمین نے اسے قلعہ کے علاقے میں ہائی وے سے اغواء کر لیا۔
