ممبئی، 23 نومبر (سیاست ڈاٹ کام) نیشنلسٹ کانگریس پارٹی کے سربراہ شرد پوار نے مہاراشٹرا میں تازہ سیاسی صورتحال سے خود کو الگ کرتے ہوئے کہا ہے کہ بھارتیہ جنتا پارٹی کے ساتھ حکومت بنانے کا ان کا نہیں بلکہ یہ فیصلہ پارٹی لیڈر اجیت پوار ہے اور ان کے ساتھ جانے والے ممبران اسمبلی کے خلاف کارروائی کی جائے گی۔ پوار نے شیو سینا سربراہ ادھو ٹھاکرے کے ساتھ ہفتہ کے روز یہاں مشترکہ پریس کانفرنس میں کہا کہ کانگریس، شیوسینا اور این سی پی نے مل بیٹھ کر مہاراشٹرا میں حکومت بنانے کا فیصلہ کیا تھا لیکن جو صورتحال سامنے آئی ہے اس میں پوری طور پر اجیت پوار کا ہاتھ ہے ۔ انہوں نے خبردار کیا کہ پارٹی کے جو رکن اسمبلی اجیت پوار کے ساتھ جائیں گے ان کے خلاف کارروائی کی جائے گی۔انھوں نے کہاکہ میرے ساتھ پہلے بھی ایسا ہوتا رہا ہے ، مجھے فکر نہیں ہے ۔ میرے پاس نمبر ہیں، مستقل حکومت ہم ہی بنائیں گے۔ پوار نے کہا کہ تینوں جماعتوں کے رکن اسمبلی کے ساتھ ہی کچھ آزاد امیدوار کے تعاون سے شیو سینا کی قیادت میں مخلوط حکومت بن رہی تھی اور اس میں 169 سے 170 تک ممبران اسمبلی کی تعداد ہو رہی تھی۔ تینوں جماعتوں نے شیو سینا کی قیادت میں حکومت بنانے کا فیصلہ کیا تھا۔ فڈنویس کے پاس اکثریت نہیں ہے اور وہ ایوان میں اکثریت ثابت نہیں کر پائیں گے ۔ انہوں نے کہا : ’’مجھے یقین ہے کہ این سی پی کا کوئی بھی رکن اسمبلی اجیت کے ساتھ نہیں جائے گا۔ اگر کوئی رکن اسمبلی ان کے ساتھ جانے کی سوچ رہے ہیں، تو انہیں پارٹی کی مخالفت کے قوانین کا علم ہونا چاہئے ۔ جو این سی پی سے باہر جانے کا فیصلہ کریں گے ان کو عوام سبق سکھائیں گے ۔ پوار نے کہا کہ جو لوگ بی جے پی کے ساتھ جائیں گے، ان کے خلاف کارروائی کی جائے گی۔
