نئی دہلی: کانگریس، ڈی ایم کے اور کچھ دیگر اپوزیشن جماعتوں نے آج ایوان زیریں لوک سبھا میں وزیر مملکت برائے داخلہ اجے کمار مشرا کو برخاست کرنے کا مطالبہ کرتے ہوئے زبردست ہنگامہ کیا، جس کی وجہ سے ایوان کی کارروائی دوپہر میں ملتوی کر دی گئی۔صبح وقفہ سوالات شروع ہوتے ہی کانگریس سمیت کچھ اپوزیشن جماعتوں کے ارکان نے مشرا کے استعفیٰ کا مطالبہ کرتے ہوئے انہیں اکتوبر میں اتر پردیش کے لکھیم پور میں ایک جیپ میں 5 کسانوں کی ہلاکت کا ذمہ دار ٹھہرایا۔اراکین کو اپنی اپنی نشستوں پر جانے کی ترغیب دیتے ہوئے لوک سبھا اسپیکر اوم برلا نے کہا کہ وقفہ سوالات کے وقت میں ایک اہم معاملہ چل رہا ہے ۔ اگر کسی رکن نے اپنی بات بتانی ہے تو وہ وقفہ سوالات کے بعد اپنی بات کرے ۔ انہوں نے کہا کہ سب کو اپنے خیالات کا اظہار کرنے کا موقع دیا جائے گا۔ یہ اچھی روایت نہیں ہے ۔ وقفہ سوالات کے بعد موضوع اٹھانے کی اجازت ہوگی۔ہنگامہ آرائی کے درمیان وقفہ سوالات جاری رکھنے کی کوشش کی گئی لیکن ہنگامہ نہیں رکا۔پارلیمانی امور کے وزیر پرہلاد جوشی نے کہا کہ کورونا ابھی مکمل طور پر ختم نہیں ہوا ہے اور اپوزیشن ارکان بغیر ماسک پہنے ایوان کے وسط میں افسران کے قریب ہنگامہ کر رہے ہیں۔
