نئی دہلی: اپوزیشن ارکان نے جمعہ کو لوک سبھا میں داخلی امور کے وزیرمملکت اجے مشرا ’ٹینی‘ کے استعفیٰ کا مطالبہ کرتے ہوئے ہنگامہ کیا، جس کے بعد پریذائیڈنگ آفیسر راجندر اگروال کو ایوان کی کارروائی دن بھر کیلئے ملتوی کرنی پڑی۔ اپوزیشن جماعتوں کے ارکا ن نعرے بازی کرتے ہوئے ایوان کے وسط میں آگئے۔ شور شرابہ کررہے ارکان نے ہاتھوں میں تختیاں لے رکھی تھیں جس میں ’لکھیم پور متاثرین کو انصاف دو‘ اور ’وزیراعظم کو ہٹاؤ’ لکھا تھا۔
اپوزیشن کے ہنگامے کے درمیان مسٹر اگروال نے وزارتوں اور پارلیمانی کمیٹیوں سے متعلق اہم کاغذات ایوان کی میز پر رکھے ۔ہنگامہ کے درمیان، کھیلوں کے وزیر انوراگ ٹھاکر نے قومی اینٹی ڈوپنگ بل 2021، ماحولیات جنگلات اور موسمیاتی تبدیلی کے وزیر بھوپیندر یادو نے وائلڈ لائف پروٹیکشن ترمیمی بل 2021 اور وزیر خزانہ نرملا سیتا رمن نے چارٹرڈ اکاؤنٹنٹ، لاگت، ورکس اکاؤنٹنٹ، کمپنی سیکریٹری بل 2021 پیش کئے ۔اس کے بعد ہنگامہ کے درمیان راجیہ سبھا کی سروگیسی ریگولیشن بل میں ترمیم کو لوک سبھا میں منظوری دے دی گئی۔پریزائیڈنگ آفیسر نے اپوزیشن ارکان کو بار بار اپنی نشستوں پر واپس جانے کی تاکید کی لیکن شور مچانے والے ارکان پر ان کی درخواستیں کا کوئی اثر نہیں ہوا۔ ایوان میں تعطل کو دیکھتے ہوئے مسٹر اگروال نے کارروائی دن بھر کے لئے ملتوی کرنے کا اعلان کیا۔
