لکھنؤ: اتر پردیش کے وزیر اعلی یوگی آدتیہ ناتھ کو سپریم کورٹ سے راحت ملی ہے۔ 2018 میں الور میں ایک انتخابی ریلی کے دوران یوپی کے وزیر اعلی یوگی آدتیہ ناتھ کے مبینہ قابل اعتراض بیان کے سلسلے میں دائر درخواست کی سماعت کرتے ہوئے، عدالت نے کہا کہ ایسی درخواستیں اخبارات میں سرخیاں بنانے کے مقصد سے دائر کی جاتی ہیں۔ عدالت اتر پردیش کے نوال کشور کی درخواست پر سماعت کر رہی تھی۔ درخواست میں الہ آباد ہائی کورٹ کے فیصلے کو چیلنج کیا گیا تھا۔ اہم بات یہ ہے کہ الہ آباد ہائی کورٹ نے بھی درخواست گزار پر 5000 روپے کا جرمانہ عائد کیا تھا۔درخواست گزار کے مطابق، آدتیہ ناتھ نے 23 نومبر 2018 کو الور میں ایک انتخابی تقریر میں ان کے مذہبی جذبات کو ٹھیس پہنچائی تھی۔ سپریم کورٹ سے رجوع کرنے سے پہلے درخواست گزار نے مؤ کی ضلعی عدالت میں وزیر اعلیٰ کی تقریر کے خلاف شکایت دائر کی تھی جسے خارج کر دیا گیا۔
