بریلی (یو پی) ، 13 ستمبر (ایجنسیز) اداکارہ دیشا پٹانی کے گھر کے باہر مبینہ طور پر بدنام زمانہ گینگ گولڈی برار کے کارندوں نے اندھا دھند فائرنگ کی ہے۔ بالی ووڈ حسینہ دیشا پٹانی کی سیول لائنز علاقہ میں واقع رہائش گاہ کے باہر گولیوں کی گڑگڑاہٹ نے سب کو دہلا دیا۔ فائرنگ کا نشانہ ان کے والد بنے لیکن وہ محفوظ رہے۔ اس واقعہ کی ذمہ داری بدنام زمانہ گولڈی برار اور روہت گودارا گینگ نے قبول کرلی ہے اور دھمکی دی کہ دیشا کی بہن خوشبو نے ہمارے ’روحانی رہنماؤں‘ کے بارے میں مبینہ توہین آمیز الفاظ کہے ہیں۔ گینگ نے سوشل میڈیا پر واقعہ کی ذمہ داری قبول کرتے ہوئے دھمکی دی کہ خوشبو پٹانی کو سبق سکھانے کیلئے حملہ کیا گیا۔ اگر انھوں نے دوبارہ ایسا کیا تو کسی کو نہیں بخشا جائے گا۔ اداکارہ اور اہل خانہ خوفزدہ ہیں اور فی الحال دیشا پٹانی اور ان کی بہن نے خاموشی اختیار کر رکھی ہے۔ خوشبو پٹانی نے صرف اتنا کہا کہ ان کے بیانات کو ’توڑ مروڑ کر‘ پیش کیا گیا تھا۔ ادھر پولیس نے علاقے کو گھیرے میں لے کر تحقیقات شروع کر دی ہیں۔ علاقے میں خوف و ہراس پھیل گیا اور بالی ووڈ حلقوں میں بھی اس واقعہ نے ہلچل مچا دی ہے۔
