چنئی، 29 اکتوبر (یو این آئی) تمل ناڈو میں ‘تملگا ویتری کژگم’ (ٹی وی کے ) کے بانی اور اداکار سے سیاستدان بنے وجے نے پارٹی کی روزمرہ کی سرگرمیوں اور انتظامی ہم آہنگی کے لیے 28 رکنی نئی انتظامی کمیٹی تشکیل دی ہے ۔ یہ کمیٹی تمل ناڈو میں آئندہ چھ سے سات ماہ بعد ہونے والے اسمبلی انتخابات کے پیشِ نظر تشکیل دی گئی ہے ۔ نئی ایکزیکیٹیو کمیٹی میں جنرل سیکرٹری بُسی آنند، انتخابی مہم کے منیجنگ جنرل سیکرٹری آدھو ارجن، جوائنٹ سکریٹری سی ٹی آر نرمل کماراور پبلسٹی سکریٹری کے جی ارون راج جیسے اہم لیڈر شامل ہیں۔ ٹی وی کے کی جانب سے جاری بیان میں کہا گیا ہے کہ اس کمیٹی میں تمل ناڈو کے مختلف اضلاع کی نمائندگی کرنے والے ضلعی سکریٹریز اور عہدیدار شامل کیے گئے ہیں۔ وجے نے کمیٹی کو انتخابات سے قبل پارٹی تنظیم کو مضبوط بنانے کا کام سونپا ہے ۔ اس کے ساتھ ہی آئندہ کی سیاسی سرگرمیوں اور تنظیمی ترقی کی تیاری کے لیے نئی کمیٹی کے ساتھ اثر انداز طریقے سے کام کرنے کے مقصد سے سبھی پارٹی کے ارکان اور افسران سے پورا تعاون کرنے کی اپیل کی ہے ۔
