ممبئی: شیو سینا (یو بی ٹی) راجیہ سبھا کے رکن سنجے راوت نے اتوار کو دعوی کیا کہ بی جے پی ان کی پارٹی کے سربراہ ادھو ٹھاکرے سے خوفزدہ ہے جو کہ اچھی بات ہے۔ سنجے راؤت نے کہا کہ بی جے پی کو ادھو سے پوچھے گئے سوالات کا خود جائزہ لینا چاہئے۔ انہوں نے دعویٰ کیا کہ بی جے پی اپنے ہی جال میں پھنس گئی ہے۔ایک سوشل میڈیا پوسٹ میں راؤت نے کہا کہ یہ اچھی بات ہے کہ بی جے پی ادھو ٹھاکرے سے خوفزدہ ہے۔ اس نے پارٹی (شیو سینا) میں تقسیم کو یقینی بنایا، ملک دشمنوں کو اس کا نام اور نشان دے دیا، ادھو ٹھاکرے اور شیو سینا (حقیقی) کا ڈر ابھی تک نہیں گیا ہے۔انہوں نے کہا کہ وہ سوچتے ہیںکہ ناندیڑ میں ان کی ریلی بی جے پی کی عوامی رابطہ مہم کا حصہ تھی یا ادھو پر تنقید کرنے کا موقع! سنجے راؤت کا یہ تبصرہ وزیر داخلہ امت شاہ کی ناندیڑ ریلی کے ایک دن بعد آیا ہے، جس میں انہوں نے 2019 کے مہاراشٹرا اسمبلی انتخابات کے بعد ہونے والی پیش رفت پر ادھو ٹھاکرے کو نشانہ بنایا تھا اور انہیں بی جے پی اور غیر منقسیم شیو سینا کے درمیان اتحاد کے ٹوٹنے کا ذمہ دار ٹھہرایا تھا۔امت شاہ نے ریاست میں مہا وکاس اگھاڑی (ایم وی اے) حکومت بنانے کے لیے کانگریس اور نیشنلسٹ کانگریس پارٹی (این سی پی) کے ساتھ ہاتھ ملانے کے ادھو کے اقدام کو اقتدار سے غداری قرار دیا تھا۔
