حیدرآباد۔10/اگست(پریس نوٹ)مرکزی وزیر کوئلہ و کانکنی رکن پارلیمنٹ حلقہ سکندرآباد بھارتیہ جنتا پارٹی جناب جی کشن ریڈی نے بی جے پی کیمپ آفس حیدرآباد میں اربعین 2025 کے خصوصی پوسٹر کا اجراء کیا۔ اس موقع پر بی جے پی کے ریاستی ترجمان میر فراست علی باقری اور کمیونٹی قائدین سید ریحان حیدر اور طاہر علی زیدی موجود تھے۔اس موقع پر جناب جی کشن ریڈی نے وزیراعظم جناب نریندر مودی کا حضرت امام حسین کی یاد میں احتراماً پیغام پہنچایا۔ وزیراعظم نے اپنے پیغام میں کہا کہ حضرت امام حسین کی قربانیاں ان کے عزم و استقلال اور حق کے ساتھ وابستگی کی عکاسی کرتی ہیں امام حسین نے دنیا کو سکھایا اور پیغام دیا ہیکہ کس طرح مصیبت اور ناانصافی کے باوجود سچائی پر قائم رہنا چاہیے۔ میر فراست علی باقری نے اربعین کی تاریخی اور روحانی اہمیت بیان کی جو یومِ عاشورہ کے چالیس دن بعد منایا جاتا ہے۔ عاشورہ وہ دن ہے جب حضرت امام حسینؑ ابن حضرت امام علی جو آخری نبی حضرت محمد مصطفیﷺ کے نواسے کی شہادت واقع ہوئی۔انہوں نے بیان کیا کہ حضرت امام حسینؑ اپنے بیشتر اہلِ خانہ اور وفادار ساتھیوں کے ہمراہ 10 محرم 61 ہجری کو کربلا کے میدان میں شہید ہوئے۔ تقریب کا اختتام اتحاد، یکجہتی اور یادگارِ کربلا کے پیغام پر ہوا جس میں امام حسینؑ کی قربانی کو پوری انسانیت کے لیے ایک ابدی تحریک قرار دیا گیا۔
