بیونس آئریس : ارجنٹینا کے نئے صدر جیویر میلی نے برکس تنظیم کا حصہ بننے کی پیشکش ٹھکرا دی۔ ارجنٹینا کے صدر کا کہنا ہے کہ روس اور چین کے برعکس امریکہ کا اتحادی بننا چاہتے ہیں۔ رپورٹس کے مطابق 22 دسمبر کو لکھے گئے خط میں جو کہ گزشتہ روز جاری کیا گیا، ارجنٹینا کے صدر نے برازیل، روس، ہندوستان، چین اور جنوبی افریقہ کے قائدین کو بتایا کہ بلاک میں ارجنٹینا کی رکنیت کا وقت مناسب نہیں ہے۔ انہوں نے اپنے خط میں کہا کہ خارجہ امور کے بارے میں میرا نقطہ نظر پچھلی حکومت سے بہت سے پہلوؤں پر مختلف ہے اور اس لحاظ سے پچھلی انتظامیہ کے کچھ فیصلوں پر نظرثانی کی جائے گی۔ غیرملکی میڈیا کے مطابق ارجنٹینا کے صدر نے مرکزی بینک اور کئی وزارتیں ختم اور پیسوں کے بجائے ڈالر استعمال کرنے کا اعلان بھی کیا ہے۔
