ممبئی ۔15؍ڈسمبر ( ایجنسیز) بالی ووڈ اداکار ارجن رامپال نے 6 سالہ دوری کے بعد اپنی پارٹنر گیبریئیلا ڈیمیٹریاڈس سے منگنی کی تصدیق کردی۔ا نہوں نے یہ انکشاف اداکارہ ریا چکرورتی کیساتھ دوران انٹرویو کیا۔انٹرویو میں گیبریئیلا ڈیمیٹریاڈس نے محبت اور والدین بننے کے تجربے پر کھل کر بات کی اور کہا کہ محبت اکثر شرائط کے ساتھ آتی ہے لیکن جب آپ کے بچے ہوں تو آپ ایسا نہیں کرسکتے۔انہوں نے کہا کہ یہ بات نہیں کہ میں اس کے پیچھے صرف اس لیے گئی کیونکہ وہ خوبصورت ہے اور امید ہے کہ اس نے بھی میرے بارے میں ایسا نہیں سوچا ہوگا۔اس پر ارجن رامپال نے ہنستے ہوئے جواب دیا کہ میں اس کے پیچھے اس لیے گیا کیونکہ وہ خوبصورت تھی پھر مجھے احساس ہوا کہ اس میں خوبصورتی کے علاوہ بھی بہت کچھ ہے۔ گیبریئیلا نے کہا کہ ہم اس وقت شادی شدہ نہیں ہیں جس پر ارجن رامپال نے فوراً کہا کہ ہم منگنی کر چکے ہیں۔ یہ سن کر ریا چکرورتی بھی حیران رہ گئیں۔واضح رہے کہ ارجن رامپال اور گیبریئیلا ڈیمیٹریاڈس 2018 سے ایک دوسرے کے ساتھ ہیں اور ان کے دو بیٹے ہیں۔