ڈائرکٹر قومی کونسل برائے فروغ اردو زبان شیخ عقیل احمد کا خطاب
نئی دہلی: اردو قلمکاروں کی اہمیت پر زور دیتے ہوئے قومی کونسل برائے فروغ اردو زبان کے ڈائرکٹر شیخ عقیل احمد نے کہا کہ سوشل میڈیا اور الیکٹرانک میڈیا کی تیزرفتار ترقیات کے دور میں قلمکاروں کے سامنے بے پناہ امکانات ہیں اور اب ہمارے تخلیق کار جدید ٹیکنالوجی کا استعمال کرکے زیادہ سے زیادہ قارئین تک پہنچ سکتے ہیں اور شہرت و ناموری حاصل کر سکتے ہیں۔انہوں نے قومی کونسل برائے فروغ اردو زبان کے تحت ’الیکٹرانک و سوشل میڈیا کے دور میں اردو مصنّفین کی ذمے داریاں‘ کے عنوان سے منعقدہ دوروزہ عالمی ویبینارکے دوسرے دن افتتاحی خطاب کرتے ہوئے کہا کہ اب قاری یا سامع کی قلت کا مسئلہ نہیں رہا،نہ تخلیقات کی اشاعت میں مشکلات درپیش ہیں، آپ سوشل میڈیا اور انٹرنیٹ کا استعمال کرکے اپنے خیالات و افکار منٹوں میں ساری دنیا تک پہنچا سکتے ہیں۔ اب اردو کے فروغ کے لیے اور خود اپنی تخلیقی صلاحیتوں کے کماحقہ اظہار کے لیے بھی جدید ٹیکنالوجی،سوشل میڈیا اور انٹرنیٹ سے آگاہی ضروری ہے۔
