حیدرآباد، 20 مارچ (یو این آئی) مولانا آزاد نیشنل اردو یونیورسٹی، ہارون خان شیروانی مرکز برائے مطالعاتِ دکن اور سوسائٹی ٹو سیو راکس، کے اشتراک سے آج صبح راک واک کا اہتمام کیا گیا۔ اس کا مقصد کیمپس میں قدرتی چٹانوں کو محفوظ رکھنے شعور بیدار کرنا تھا۔ یہ چٹانیں چھوٹے تالابوں، پیڑ پودوں، پھولوں اور پرندوں کا مسکن ہیں جن کا تحفظ ضروری ہے ۔ پروفیسر فاطمہ علی خان، صدر سوسائٹی، محترمہ فروکے قادر اور دیگر نے خطاب میں کہا کہ اس کا مقصد سطح مرتفع دکن کی قدیم و منفرد گرانائٹ چٹانوں کی دیکھ بھال اور تحفظ کے متعلق شعور بیداری ہے ۔ پروفیسر سید عین الحسن، وائس چانسلر نے ایسی سرگرمیوں کو طلبہ کیلئے مفید قرار دیا۔ واک کے بعد ارضیاتی تنوع پر پروفیسر اے سی نارائنن، محترمہ کبیتا داس کولی، پروفیسر پروین سکسینہ کے لیکچر ہوئے ۔پروفیسر سلمیٰ احمد فاروقی، ڈائرکٹر مرکز اور ڈاکٹر اے سبھاش، اسسٹنٹ پروفیسر نے انتظامات کیے ۔یونیورسٹی طلبہ کے علاوہ ماحولیات سے دلچسپی رکھنے والے افراد نے شرکت کی۔
