کھٹمنڈو۔8 ڈسمبر ( سیاست ڈاٹ کام ) پاکستان کے لئے کھیل کے میدان سے اچھی خبر آئی ہے جیسا کہ ساوتھ ایشین گیمز میں اتھلیٹ ارشد ندیم نئی تاریخ رقم کرتے ہوئے براہ راست ٹوکیو اولمپکس میں رسائی کرنے والے واحد پاکستانی اتھلیٹ بن گئے ہیں۔ نیپال کے شہر کھٹمنڈو میں جاری ساؤتھ ایشین گیمز میں پاکستان کے محمد ارشد ندیم نے جیولین تھرو کے مقابلوں میں شاندار کھیل پیش کرتے ہوئے 86.23میٹر دْور تھرو کرکے ایشین اور نیشنل گیمز میں نیا ریکارڈ بنالیا ہے۔ اس سے قبل جویلین تھرو میں سب سے زیادہ دور تک پھینکنے کا ریکارڈ ہندوستان کے پاس تھا جو 83.23 میٹر کا تھا۔ مقابلے میں ہندوستان کے شیوپال سنگھ 84.16 میٹر کے ساتھ دوسرے پر رہے اور اپنے ملک کے لیے ریکارڈ بہترکردیا جبکہ سری لنکا کے سمیدھا جگتھ 74.79 میٹر کے ساتھ تیسرے نمبر پر رہے۔
