ایٹا نگر ۔11؍ڈسمبر ( ایجنسیز )اروناچل پردیش کے انجاؤ ضلع میں جمعرات 11 دسمبر کو ایک دل دہلا دینے والا حادثہ پیش آیا ۔ چکلاگم علاقہ میں مزدوروں کو لے جا رہا ایک ٹرک خطرناک پہاڑی راستے سے پھسل کر ہزاروں فٹ گہری کھائی میں جا گرا۔ ٹرک میں 22 مزدور سوار تھے اور تمام کی اس حادثہ میں موت ہو گئی ہے۔ میڈیا کے مطابق ٹرک میں 19 مزدور آسام کے تن سکیا ضلع کے گولا پکھوری ٹی اسٹیٹ کے رہنے والے تھے۔ اب تک 13 مزدوروں کی نعشیں برآمد ہوئی ہیں دیگر مزدوروں کی نعشیں تلاش کی جا رہی ہیں۔حادثہ کے شکار تمام مزدور سڑک کی تعمیر کے کام کیلئے جا رہے تھے اسی وقت ہیلونگ-چکلاگم سڑک پر میٹیلانگ کے پاس ٹرک بے قابو ہو کر پہاڑ سے نیچے گر گیا۔ حادثے کے وقت ٹرک میں 22 مزدور سوار تھے۔ سڑک سے گزر رہے لوگوں نے جب ٹرک کو کھائی میں نیچے گرتے دیکھا تو پاس کے پولیس تھانے میں اس کی اطلاع دی۔ پولیس اور فائر بریگیڈ کی ٹیم موقع پر پہنچی اور راحت بچاؤ کے کام انجام دئے۔19 مزدوروں کی شناخت ہو چکی ہے۔ ان کے نام بدھیشور دیپ، راہول کمار، سمیر دیپ، جون کمار، پنکج مانکی، اجے مانکی، وجے کمار، ابھے بھومیج، روہت مانکی، بیریندر کمار، اگر تاتی، دھیرین چیتیا، رجنی ناگ، دیپ گولا، رام چبک سونار، سوناتن ناگ، سنجے کمار، کرن کمار اور جوناس منڈا شامل ہیں۔
یہ تمام 19 مزدور آسام کے گولا پکھوری چائے باغان، تنسکیا کے رہنے والے تھا۔
