ٹاؤنٹن ۔12 جون (سیاست ڈاٹ کام ) پاکستانی ٹیم کے کپتان سرفراز احمد نے پاکستانی شائقین سے درخواست کی ہے کہ وہ سابق کپتان اسٹیون اسمتھ پر جملے نہ کسیں۔ ہندوستان کے خلاف میچ میں ایشیائی ملک کے تماشائیوں نے باؤنڈری پر اسمتھ پر جملے کسے اور انہیں ’چیٹر چیٹر‘ کہہ کر پکارا تھا۔ اس موقع پر کپتان ویراٹ کوہلی نے بہترین اسپورٹس مین اسپرٹ کا مظاہرہ کرتے ہوئے اپنے شائقین پر برہمی کا اظہار کرتے ہوئے انہیں جملے کسنے سے منع کیا تھا۔ اسی حوالے سے جب پاکستانی ٹیم کے کپتان سے سوال کیا گیا تو انہوں نے کہا کہ میرے خیال میں پاکستانی شائقین ایسا نہیں کریں گے، پاکستانی عوام کرکٹ اور کھلاڑیوں سے محبت کرتے ہیں۔ اسمتھ اور وارنر کو ممکنہ طور پر شائقین کی تنقید سے بچانے کے لیے انگلینڈ کے کپتان ایان مورگن نے بھی ان کی حمایت کی تھی اور اپنے ملک کے شائقین سے درخواست کی تھی کہ سابق کپتان اسمتھ اور اوپنروارنر پر جملے نہ کسیں۔۔ واضح رہے کہ گزشتہ سال جنوبی افریقہ کے خلاف کیپ ٹاؤن ٹسٹ کے دوران آسٹریلیائی کرکٹر کیمرون بین کرافٹ بال ٹیمپرنگ کرتے ہوئے پکڑے گئے تھے جس پر اس وقت کے ٹیم کے کپتان اسٹیون اسمتھ نے غلطی کا اعتراف کر لیا تھا۔
