برسبین ۔21 نومبر (سیاست ڈاٹ کام ) پاکستان اور آسٹریلیا کے درمیان شروع ہوئی ٹسٹ سیریز کے پہلے میچ میں اوپنرز کے بہتر آغاز کے بعد بیٹنگ لڑکھڑا گئی اور پاکستانی ٹیم اسد شفیق کے 76 رنز کے باوجود پہلی اننگز میں 240 رنز بنا کر آؤٹ ہوگئی۔ برسبین میں کھیلے جانے والے پہلے ٹسٹ میچ میں پاکستانی ٹیم کے کپتان اظہر علی نے ٹاس جیت کر بیٹنگ کا فیصلہ کیا۔ ابتدا سے ہی پاکستانی ٹیم کے اوپنر شان مسعود اور اظہر علی نے محتاط انداز میں بیٹنگ کی، تاہم وکٹ پر موجود رہے اور ڈرنکس کے وقفے تک ٹیم نے 13 اوورز میں بغیر کسی نقصان کے 33 رنز بنالیے۔ دونوں اوپنرز نے ٹیم کو بہتر آغاز فراہم کرتے ہوئے اسکور 75 رنز تک پہنچایا تھا کہ شان مسعود 97 گیندوں پر 27 رنز بناکر پیٹ کمنزکی گیند کا شکار بن گئے۔ شان مسعود کا آؤٹ ہونا تھا کہ ٹیم کے کھلاڑیوں کے پولین لوٹنے کی قطار لگ گئی اور 75 کے ہی مجموعی اسکور پر اظہر علی 104 گیندوں پر 39 رنز بنا کر آؤٹ ہوگئے۔ جس کے بعد کریز پر موجود حارث سہیل اور اسد شفیق میں بھی کوئی پارٹنر شپ نہ ہوسکی اور بائیں ہاتھ کے حارث سہیل صرف ایک رنز بناکر 77 کے مجموعی اسکور پر اپنی وکٹ گنوا بیٹھے۔ ان کے جانے کے بعد اگلے آنے والے بابر اعظم تھے جو صرف ایک رنز بنا سکے اور وہ بھی پویلین لوٹ گئے۔ 78 کے مجموعی اسکورز پر 4 کھلاڑی آؤٹ ہونے کے بعد اسد شفیق اور افتخار احمد نے ٹیم کا اسکور کچھ آگے ہی بڑھایا تھا کہ 94 کے مجموعی اسکور پر افتخار احمد بھی 46 ویں اوورز میں صرف 7 رنز بنا کر نیتھن لیون کا شکار بنے۔ آدھی ٹیم کے پویلین لوٹنے کے بعد کھلاڑی دباؤ کا شکار ہوگئے اور انتہائی محتاط انداز میں بیٹنگ کرتے ہوئے 46 اوورز 4 گیندوں پر 100 رنز مکمل کیے۔ جس کے بعد ٹیم کے مڈل آرڈر بیٹسمن اسد شفیق اور وکٹ کیپر محمد رضوان نے ٹیم کا اسکور آگے بڑھایا اور چائے کے وقفے تک پاکستانی ٹیم نے 52 اوورز میں 5 وکٹ پر 125 رنز بنا ئے تھے۔ 143 کے مجموعی اسکور پر وکٹ کیپر محمد رضوان 34 گیندوں پر 37 رنز بنا کر آؤٹ ہوگئے۔ 6 کھلاڑیوں کے نقصان کے بعد اسد شفیق کا ساتھ دینے یاسر شاہ آئے اور دونوں کھلاڑیوں نے ٹیم کے اسکور کو آگے بڑھایا اور اسد نے 99 گیندوں پر اپنی نصف سنچری مکمل کی۔ 227 رنز کے مجموعی اسکور پر یاسر شاہ 83 گیندوں پر 26 رنز بنا کر پویلین لوٹ گئے۔ بعد ازاں ٹیل اینڈرز نسیم شاہ اور عمران خان بھی زیادہ مزاحمت نہیں کرپائے اور 240 کے مجموعی اسکور پر پوری پاکستانی ٹیم آؤٹ ہوگئی۔ پاکستان کی جانب سے اسد شفیق 76 رنز بنا کر نمایاں رہے ۔ ان کے بعد آنے والے کھلاڑی شاہین شاہ آفریدی بغیر کسی رنز کے اضافے کے 227 کے مجموعی اسکور پر آؤٹ ہوئے، ایک ساتھ 2 وکٹیں گرنے کے بعد کریز پر موجود اسد شفیق بھی دباؤ میں آگئے اور وہ بھی اسی مجموعی اسکور پر 76 رنز بنا کر بولڈ ہوگئے۔جبکہ آسٹریلیا کے مچل اسٹارک نے 4، پیٹ کمنز نے 3 اور جوش ہیزل ووڈ نے 2 وکٹیں حاصل کیں۔
