ریاض : 11 ستمبر ( یو این آئی) سعودی ولی عہد شہزادہ محمد بن سلمان نے خطے میں اسرائیلی حملوں کی شدید الفاظ میں مذمت کی ہے۔سعودی ولی عہد نے مجلس شوریٰ کونسل کے سالانہ اجلاس سے خطاب میں کہا کہ قطر کی جانب سے کیے جانے والے ہر اقدام میں اس کے ساتھ کھڑے ہیں۔انہوں نے مزید کہا کہ اس قسم کی جارحیت کا مقابلہ کرنے اورانہیں روکنے کے لیے اقدامات کرنے ہوں گے، ساتھ ہی واضح کیا کہ غزہ فلسطینی زمین ہے اور کوئی بھی جارحیت انہیں ان کے حقوق سے محروم نہیں کر سکتی۔ادھر متحدہ عرب امارات کے صدر شیخ محمد بن زاید النہیان اظہار یکجہتی کے لیے دوحہ پہنچ گئے جہاں قطر کے امیر شیخ تمیم بن حمد الثانی نے ائیرپورٹ پر ان کا استقبال کیا۔قطر کے وزیراعظم کا کہنا تھا دوحہ پر حملہ اسرائیل کی ریاستی دہشت گردی ہے جس کا جواب دینے کا حق رکھتے ہیں۔انہوں نے کہا کہ اسرائیلی حملے نے یرغمالیوں کی رہائی کی تمام امیدیں ختم کر دیں، مطالبہ کیا کہ نیتن یاہوکو انصاف کے کٹہرے میں لایاجائے۔ مصری صدر عبدالفتاح السیسی اور اردن کے شاہ عبداللہ دوم نے بھی قطر کے ساتھ مکمل یکجہتی کا اعادہ کیا۔یاد رہے کہ ایک روز قبل اسرائیل نے قطر کے دارالحکومت دوحہ میں حماس قیادت پر حملہ کیا، اس حملے میں سینئر حماس رہنما خلیل الحیا کے بیٹے، ان کے دفتر کے ڈائریکٹر سمیت 6 افراد شہید ہوئے تاہم اس حملے میں حماس کی قیادت محفوظ رہی۔
شہزادہ محمد بن سلمان کا آج دوحہ کا دورہ
ریاض، 11 ستمبر (یو این آئی) سعودی عرب کے ولی عہد شہزادہ محمد بن سلمان کا آج دوحہ کے دورے کا امکان ہے ۔ میڈیاکے مطابق سعودی عرب کے ولی عہد شہزادہ محمد بن سلمان کا قطر کا یہ دورہ پہلے سے طے شدہ نہیں تھا۔ میڈیاکا کہنا ہے کہ متحدہ عرب امارات کے صدر شیخ محمد بن زید النہیان قطر پہنچ چکے ہیں۔ یاد رہے کہ اردن کے ولی عہد حسین بن عبداللّٰہ نے بھی گزشتہ روز قطر کا دورہ کیا تھا۔