غزہ: اسرائیلی فوج کے حملے میں 9 بچوں سمیت ایک ہی خاندان کے 15 افراد شہید ہوگئے۔ ادھراسرائیلی فوج نے مغربی کنارے کے شہر جنین میں ایک کار پر ڈرون حملہ کرکے دو فلسطینی نوجوانوں کو شہید کردیا۔ اسرائیلی فوج نے ایک گودام پر حملہ کردیا جس میں فلسطینی پناہ لیے ہوئے تھے ۔ اس حملہ میں 9 بچوں سمیت 15 افرادشہید ہوگئے۔ عرب میڈیا کے مطابق اسرائیلی فوج نے وسطی غزہ کے علاقے الزوأدہ میں قائم ایک گودام پر رات گئے بمباری کی جس کے نتیجے میں وہاں پناہ لیے ہوئے 16 افراد شہید ہوئے جن میں سے 15 کا تعلق ایک ہی خاندان سے تھا جبکہ شہید ہونے والوں میں خواتین اور بچے بھی شامل تھے۔ میڈیا کا بتانا ہے کہ اسرائیلی فوج نے جبالیہ پناہ گزیں کیمپ، دیرالبلاح، خان یونس پر بھی بمباری کی اور اسرائیلی بمباری میں متعدد فلسطینی شہید اور زخمی ہوئے جبکہ اسرائیلی فوج نے مغربی کنارے کے شہر جنین میں بھی ایک کار پر ڈرون حملہ کرکے دو فلسطینیوں کو شہید کردیا۔ ادھر غزہ جنگ بندی کیلئے مذاکرات میں امریکہ نے نئی تجاویز پیش کردیں۔دوسری جانب اسرائیلی مذاکرات کار آج غزہ جنگ بندی پر مزید بات چیت کیلیے قاہرہ جائیں گے ۔ واضح رہے غزہ جنگ بندی سے متعلق رواں ہفتے دو دن تک جاری مزاکرات کے بعد مشترکہ بیان میں کہا گیا تھا کہ امریکہ کی جانب سے گزشتہ ہفتے اتفاق شدہ نکات پر تیزی سے عملدرآمد کی راہ میں حائل رکاوٹیں دور کرنے کیلئے تجاویز پیش کی گئیں ہیں ۔امریکا، قطر اور مصر کی ثالثی میں ہونے والے مذاکرات میں اسرائیل نے بھی شرکت کی تاہم حماس نے مذاکرات میں حصہ نہیں لیا اور مؤقف اختیار کیا کہ اس سے پہلے جو مذاکرات ہوئے ان میں جن نکات پر اتفاق ہوا تھا اسرائیل نے اس کی پاسداری نہیں کی۔
