بیروت:حماس کے رہنما اسامہ حمدان نے کہا کہ حماس مصر اور قطر کی جانب سے جنگ کو روکنے کے لیے پیش کئے گئے کسی بھی نوعیت کے اقدام کے لیے تیار ہے، قیدیوں کے تبادلے کے مذاکرات اس وقت تک میز پر نہیں ہوں گے جب تک اسرائیل اپنا حملہ بند نہیں کر دیتا۔ حماس کے رہنما نے کہا کہ اسرائیل اسپتالوں پر بمباری اور طبی عملے کو گرفتار کرنے کا سلسلہ جاری رکھے ہوئے ہے، فلسطین لبریشن آرگنائزیشن کی ایگزیکٹو کمیٹی کے سکریٹری حسین الشیخ کے حالیہ بیانات قومی ذمہ داری کا اظہار نہیں کر رہے ہیں۔انہوں نے مزید کہا کہ قومی ذمہ داریوں کا تعین کرنے والے فلسطینی عوام ہے اور کوئی نہیں، ہمیں افسوس ہے کہ عوام کی خدمت کرنے والے لوگ اسرائیل کے ساتھ سمجھوتہ کرنے کی شرط لگا رہے ہیں۔اسامہ حمدان کا کہنا تھا کہ اسرائیل ایک مست ہاتھی کی طرح فلسطینیوں پر مظالم ڈھا رہا ہے، عالمی برادری اپناکردار ادا کرنے کے بجائے خاموش تماشائی بن کر بیانات جاری کررہی ہیں، اسلامی ممالک کے حکمران صف اول میں کردار ادا کرنے سے کترا رہے ہیں۔
