یروشلم ۔ 9 مارچ (ایجنسیز) اسرائیل کے صدر آئیزیک ہرزوگ نے امریکی صدر ڈونالڈ ٹرمپ کے اس مطالبے پر ردعمل کا اظہار کیا ہے جس میں اْنہوں نے کہا تھا کہ وزیر اعظم بنجامن نیتن یاہو کو معاف کر دیا جائے تاکہ وہ ایران کے ساتھ جاری جنگ پر پوری توجہ دے سکیں۔ امریکی ٹی وی چینل ’فاکس نیوز‘ کو دیے گئے ایک انٹرویو میں آئیزیک ہرزوگ نے کہا کہ اسرائیل ایک خودمختار ریاست ہے جہاں تمام فیصلے قانون کے مطابق کیے جاتے ہیں۔ انہوں نے واضح کیا کہ ملک کا عدالتی نظام آزاد ہے اور قانونی معاملات اپنے طے شدہ طریقہ کار کے تحت چلتے ہیں۔ واضح رہے کہ ڈونالڈ ٹرمپ نے حال ہی میں بیان دیا تھا کہ بنجامن نیتن یاہو کو قانونی مقدمات سے چھٹکارا ملنا چاہیے تاکہ وہ ایران کے خلاف جاری جنگی صورتحال پر مکمل توجہ مرکوز کر سکیں۔ عرب میڈیا کے مطابق اسرائیلی صدر آئیزیک ہرزوگ کے بیان کو اسرائیلی نظامِ انصاف کی خودمختاری پر زور دینے کے طور پر دیکھا جا رہا ہے۔
