غزہ پٹی : اسرائیلی فوج کی نگرانی میں مقامی اور غیر ملکی صحافیوں نے شمالی غزہ کا دورہ کیا ہے اور تباہی کے مناظر اپنی آنکھوں سے دیکھے۔عرب میڈیا کے مطابق شمالی غزہ کا دورہ کرنے والے آسٹریلوی میڈیا کے صحافی کا کہنا ہے کہ یہ مکمل تباہی کا منظر ہے، ایک انتہائی فعال اور خطرناک جنگ ہے۔صحافی نے اظہار خیال کرتے ہوئے کہا کہ غزہ میں عمارتیں بمباری سے داغدار اور سیاہ ہوگئی ہیں، ٹینکوں کی بمباری سے آسمان پربلند ہوتے شعلے دیکھے جا سکتے ہیں، فوج کی نقل و حرکت کو فلمانے یا نشر کرنے کی اجازت نہیں ہے۔عرب میڈیا کے مطابق صحافیوں کو محصور پٹی میں داخل ہونے کی اجازت نہیں دی گئی۔دوسری جانب اسرائیلی حکام جنوبی اسرائیل میں روزانہ کنٹرول میڈیا ٹورز کرا رہے ہیں۔کمیٹی ٹو پروٹیکٹ جرنلسٹس کے مطابق غزہ جنگ میں اب تک 36 صحافی مارے جا چکے ہیں۔خیال رہے کہ غزہ میں 7 اکتوبر سے اب تک 3 ہزار 900 بچوں اور 2 ہزار 509 خواتین سمیت شہید فلسطینیوں کی تعداد 9 ہزار 500 سے زائد ہو چکی ہے جب کہ 6 ہزار 360 بچوں اور 4 ہزار 891 خواتین سمیت زخمیوں کی تعداد 24 ہزار 158 سے تجاوز کر چکی ہے۔
