واشنگٹن: امریکہ نے اسرائیل اور متحدہ عرب امارات کے درمیان پروازوں کی بحالیکا خیرمقدم کیا ہے۔وائٹ ہاؤس کی قومی سلامتی کونسل نے کل جاری ایک بیان میں کہا’’متحدہ عرب امارات اور اسرائیل کے مابین اپنی سرزمین پر پرواز کرنے کی اجازت دینے کے متحدہ عرب امارات کے فیصلے کا امریکہ خیرمقدم کرتا ہے‘‘۔ کونسل نے ٹوئٹ کیا ’’ معاہدے پر عمل درآمد کے بارے میں صدر ڈونلڈ ٹرمپ کے ویژن کا یہ ایک اور اہم قدم ہے‘‘۔ یہاں یہ تذکرہ بیجا نہ ہوگا کہ اسرائیل اور متحدہ عرب امارات نے گذشتہ ماہ ایک تاریخی معاہدہ کیا ہے۔ جس کے تحت دونوں ممالک کے مابین سفارتی تعلقات قائم ہوئے۔ متحدہ عرب امارات اسرائیل کے ساتھ تعلقات معمول پر لانے والا خلیج فارس میں پہلا ملک بن گیا ہے۔متحدہ عرب امارات اسرائیل کے ساتھ باضابطہ معاہدہ کرنے والا مصر اور اردن کے بعد تیسرا عرب ملک ہے۔ بحرین اور عمان سمیت دیگر خلیجی ممالک مستقبل قریب میں بھی اسرائیل کے ساتھ ایسا ہی معاہدہ کر سکتے ہیں۔