15 زخمیوں میں 6 کی حالت تشویشناک‘2حملہ آوروں کو گولی ماردی گئی
یروشلم۔8؍ستمبر ( ایجنسیز) اسرائیل کے شہر یروشلم میں پیر کو بس اسٹاپ پر فائرنگ کے نتیجے میں 5 افراد ہلاک ہوگئے۔ اس حملے میں 15 افراد زخمی بھی ہوئے۔ ان میں سے 6 کی حالت تشویشناک ہے۔پیرامیڈیکس نے بتایا کہ شمالی یروشلم کے ایک مصروف چوراہے پر واقع ایک بس اسٹاپ پر دو حملہ آوروں کی فائرنگ میں کم از کم 5 افراد ہلاک ہوگئے۔ پیرامیڈیکس نے بتایا کہ 15 دیگر افراد زخمی ہوئے ہیں جن میں 6 کی حالت تشویشناک ہے۔پولیس نے بتایا کہ حملہ آوروں نے بس اسٹاپ پر انتظار کر رہے لوگوں کو گولی مار دی۔ اسی دوران اسرائیلی میڈیا نے بتایا کہ حملہ آور بھی ایک بس میں سوار ہوئے اور اندر سے فائرنگ کی۔جیسے ہی واقعہ شروع ہوا پولیس، ایک سیکورٹی اہلکار اور ایک شہری نے2 حملہ آوروں کو گولی مار دی۔ اس کے بعد حملہ رک گیا۔ ساتھ ہی پولیس نے حملہ آوروں کی حالت یا ان کی شناخت کے حوالے سے کوئی جواب نہیں دیا۔یہ فائرنگ یروشلم کے شمالی داخلی دروازے پر ایک بڑے چوراہے پر ہوئی جو مشرقی یروشلم میں واقع یہودی بستیوں کی طرف جانے والی سڑک پر ہے۔حملے کی فوٹیج میں دکھایا گیا ہے کہ صبح کے ہجوم کے وقت درجنوں لوگ ایک مصروف چوراہے پر بس اسٹاپ سے بھاگ رہے ہیں۔ جائے وقوعہ پر پہنچنے والے طبی عملے نے بتایا کہ علاقہ افراتفری کا شکار ہے۔ زمین پر ٹوٹے ہوئے شیشے پڑے ہیں۔ کچھ لوگ سڑک پر بے ہوش پڑے تھے۔ اس کے ساتھ ساتھ فلسطینی عسکریت پسند گروپوں کی جانب سے اس حملے پر فوری طور پر کوئی تبصرہ نہیں کیا گیا ہے۔غزہ کی جنگ نے اسرائیل کے زیر قبضہ مغربی کنارے اور اسرائیل دونوں میں تشدد میں اضافہ کیا ہے۔ فلسطینی عسکریت پسندوں نے اسرائیل اور مغربی کنارے میں اسرائیلیوں پر حملہ کر کے انہیں ہلاک کر دیا ہے۔ دوسری طرف فلسطینیوں کے خلاف تشدد میں بھی اضافہ ہوا ہے۔
