تل ابیب: اسرائیلی حکومت نے ملک میں کورونا وبا کے تیزی سے جاری پھیلائو کی روک تھام کی خاطر ایک ہفتہ کیلئے بین الاقوامی فضائی آپریشن معطل کردیا ہے۔ اسرائیلی حکومت کی طرف سے کورونا کے پھیلائو کی روک تھام کے سلسلے میں کیے جانے والے دیگر اقدامات میں ویکسین کی فراہمی اور فضائی خدمات کی ایک ہفتہ کیلئے معطلی شامل ہے۔ اسرائیلی حکومت کم عمر افراد کو ویکسین لگانے کی مہم شروع کر رہی ہے۔عبرانی ریاست کی طرف سے 90 لاکھ کی آبادی میں 25 لاکھ آبادی کو ویکسین فراہم کئے جانے کے باوجود حالیہ ایام میں کورونا کی وبا میں غیرمعمولی تیزی دیکھی گئی ہے۔ جنوری میں سامنے آنے والے کورونا کیسز کی ایک بڑی وجہ صہیونی ریاست میں سماجی دوری پرعمل درآمد نہ کرنا ہے۔ ہفتہ کو اسرائیلی وزیراعظم بنجامن نتن یاہو نے ایک ہفتہ کیلئے غیرضروری کاروباری سرگرمیاں بند کرنے اور ایک ہفتہ کیلئے بین الاقوامی فضائی سرویس بند کرنے کا اعلان کیا تھا۔
